Зургаан жилийн өмнө тавдугаар сарын 30-нд Монгол Улсын далбаа дэлхийн ноён оргилд анх мандсан түүхтэй. Үүнээс хойш Монголын төрийн далбаа дэлхийн дээвэр дээр гурвантаа мандлаа. Гурав дахь далбааг мандуулсан олон улсын хэмжээний мастер Б.Гангаамаа өнгөрсөн дөрөвдүгээр сарын 4-нд нийслэлээс мордож, Англи, АНУ, Канад, Польш зэрэг 30 гаруй орны уулчинтай нийлэн Непалын олон улсын уулчдын багт орж Гималайд авирсан юм. Тэрбээр уржигдар эх орондоо ирлээ.

Түүнийг өчигдөр Биеийн тамир спортын газрын дарга Ч.Наранбаатар болон Монголын үндэсний олимпийн хорооны ерөнхийлөгч Д.Загдсүрэн нар хүлээн авч уулзан, Биеийн тамир спортын тэргүүний ажилтан цолоор шагналаа. БТСГ-ын дарга Ч.Наранбаатар “Б.Гангаамаа олон жилийн судалгаа, шинжилгээ, хичээнгүй хөдөлмөрийнхөө үр дүнд Монголын эмэгтэй уулчдаас анхлан Эверестэд хөл тавьж, зорилгоо биелүүлээд ирлээ. Гималайн оргилд хүн болгон гараад байдаггүй. Үүнийг би олимпийн аварга болсон амжилттай адилтгаж гавьяатай үйлс гэж үнэлж байна” хэмээн хэллээ.

Олон улсын хэмжээний мастер Б.Гангаамаатай ярилцлаа.

-Эверестэд авирна гэдэг уулчин бүрийн хүсэл байх. Та дэлхийн ноён оргилд хүрсэн сэтгэгдлээсээ хуваалцаач.

-Тамирчин бүр олимпод оролцох, олимпийн аварга болохыг мөрөөддөг. Үүнтэй адил уулын спортын тамирчдын гол мөрөөдөл нь Эверест. Сүүлийн арваад жил энэ талаар судалгаа хийж, бэлтгэл сургуулилалтаа базаасан. Өмнө нь Эверестэд авирах Монголын эмэгтэй уулчдын багийг зохион байгуулж, ахалж явсан болохоор бага зэрэг туршлага байсан. Хэдийгээр 2006 онд манай багийнхан дэлхийн оргилд хүрэхэд 168 метр дутуу байхад буусан ч энэ авиралт надад том туршлага болсон. Дэлхийн зулайд гарах авиралтыг эхлүүлсэн хүний хувьд таван жилийн хугацаанд нарийн төлөвлөгөө боловсруулаад түүнийхээ дагуу Эверестийн оргилд гараад ирлээ. Маш их баяртай байна.

-Та Эверестийн оргилд хэрхэн хүрэв. Оргилд хэдэн минут байсан бэ?

-Би хоёр сарын турш зөвхөн дээшээ өгссөн. Харин Эверестийн оргилд гарснаа доошоо буухдаа мэдэрсэн. Оргилд удаан байх боломжгүй. Маш бага талбайтай. Би 10 минут орчим болоод доошоо буусан. Уулсын ноён оргил Эверестэд 3000 орчим уулчин авирсан байдаг. Тэдний нэг болно гэдэг бахархал. Ер нь саад бэрхшээлийг даван туулсны эцэст уулын оргилд гарсан сэтгэгдлийг үгээр илэрхийлэхэд хэцүү.

21.00 цагт 8300 метрээс дээшээ авираад үүр цайж байхад буюу 06.00 цагт оргил дээр гарсан. Оргилоос доош харахад үүлс нүүгээд сайхан харагдаж байсан. Гэхдээ уулчин болоход хугацаа шаарддаг. Зөвхөн ууланд авирдаг болоход 10 жил хэрэгтэй. Харин сайн уулчин болоход хөдөлмөр, зориг, тэвчээр бас мөнгө шаардагдана. Анхаарал сэрэмжээ цаг, мөч бүхэнд алдахгүй байх ёстой.