Арсеналын цом шагналын өрөө эзгүйрсээр зургаа дахь жилийнхээ нүүрийг үзэж байна. Улирал бүрийн эхэнд  Арсен Венгерийн хөвгүүд одоо л “гэрэлтэх” цаг нь болсон гэж ярьдаг боловч төгсгөл нь үргэлж хэвийн байсаар ирлээ. Багийн удирдлага бага туршлага, аз дутлаа. ирэх улирлаас бүхнийг шинээр эхэлнэ хэмээж фенүүд сэтгэлээр унаж дуусдаг. Харин энэ улирлын хувьд өмнөх жилүүдээс онцлох зүйл нилээдгүй байлаа.

“Буучид” улирлын эхний хагасыг гайхалтай тавьж Аваргуудын лиг, премьер лиг, цомын тэмцээн гээд бүгдэд нь дажгүй амжилттай үргэлжлүүж байсан. Бүр Лигийн цомын финалд хүртэл шалгарч цомгүй жилүүдээ төгсгөл болгоход ойрхон байлаа. Харамсалтай нь “азгүй” гэх тодотгол нь тэднийг дахин дайрч итгэмээргүй байдлаар энэ бүхэн өндөрлөсөн билээ. Үүнээс хойш муу үйл явдлууд ар араасаа хөвөрч ФА цом, Аваргуудын лиг, премьер лиг гээд бүх боломжтой фронтоо тэд алдсан. Энэ бүхнээс харахад Арсеналд нөөц сайтай нягт бүрэлдэхүүн хэрэгтэй гэдэг нь харагдаж байна.

Сэтгэлзүйн бэлтгэл тааруу байгаагаас нэг ялагдлаас болж багийн амжилт тэр чигээрээ уруудаж сэргэлт авч чадахгүй байгаа. Тиймээс залуусыг удирдан чиглүүлж, талбай дээр жинхэнэ лидер байж чадах туршлагатай тоглогч энэ багт хэрэгтэй буй. Венгер ч энэ зун өмнөх алдаагаа давталгүй идэвхитэй ажиллаж биеийн хүчний тоглолт сайтай, туршлагатай тоглогч хайхаа амласан. Хэрвээ Венгер амлалтаа биелүүлж чадвал ирэх жил Буучид шинэ эринээ эхлүүлж болох юм. Тэд бага багаар амжилтын оргил руу ойртсоор л байна. Ингээд улиран одсон 2011/11 улиралд хэн энэ багийн шилдэг нь байв.

1. Самир Насри (Хагас хамгаалагч)

Нас : 23

Тоглолт : 44

Гоол/дамжуулалт : 15/4

Шар хуудас  : 5

Жил ирэх тусам Насригийн тоглолтыг үзэх урамтай болоод л байна. Хамгаалагчдыг тун эвлэгхэн аргалж, хэрэгтэй хүнд нь бөмбөгийг дамжуулах чадвар нь Арсеналд тун их хэрэг болдог. Хэрвээ Фабрегас энэ зун багаасаа явчихвал Самир Насри энэ багийн лидер болж үлдэх байх. Тийм ч учраас Насритай холбоотой янз бүрийн цуу яриаг Венгер тэр дор нь үгүйсгэж байгаа.

Премьер лигийн улирлын шилдэг тоглогч болон залуу тоглогчын шагналд Насри нэр дэвшсэн ч харамсалтай нь аль алийг нь авч чадаагүй. Гарет Бэйл болон Жек Уйлшир нар эдгээ шагналыг гардсан. Гэхдээ Самирын гол шагнал хөгжөөн дэмжигчдынх нь итгэл хүндлэл болохоор тэр сэтгэл дундуур үлдээгүй байх.

2. Войцех Щесны (Хаалгач)

Нас : 21

Тоглолт : 23

Клин-шит :  9

Шар хуудас  : 1

Венгерийн толгойны өвчин болсон хаалгачын асуудлыг нэг тийш нь цэгцэлж өгсөн “ачтай” Польш тоглогч. Улирлын эхнээс бага багаар дасгалжуулагчынхаа итгэлийг олсоор 2011 он гараад үндсэн хаалгач болтлоо дэвшиж чадсан. Үүнд мэдээж бусад Алмуния, Фабяньскигийн бэртэл гэмтэл нөлөөлсөн. Улирлын турш нийт 9 клин-шит хийсэн нь туршлага нимгэн хаалгачын эхний улирал гэхэд боломжын үзүүлэлт. Мэдээж тэр супер-мэн биш болохоор алдаа гаргаж байсан.

Тухайлбал лигийн цомын финалд хамгаалагчидтайгаа ойлголцож чадалгүй багаа хөөдөж Мартинсийн гоолыг алдсан. Гэхдээ гаргасан алдаа нь хийсэн хаалтуудынх нь хажууд хавьгүй цөөхөн болохоор Щесныг буруутгах үндэс алга. Улирлын төгсгөлд Arsenal.com-д явуулсан санал асуулгаар энэ жилийн шилдгээр тодорсон байгаа.

3. Жек Уилшир (Хагас хамгаалагч)

Нас : 19

Тоглолт : 49

Гоол/дамжуулалт :  2/9

Шар/улаан хуудас   : 8/1

Английн хөлбөмбөгт Уилшир өөрийгөө хэн гэдгийг таниулсан улирал боллоо. Өмнө нь түүнийг ирээдүйтэй гэдгээр нь хүмүүс мэддэг байсан ч бодож байснаас нь хавьгүй хурдан өсөж буйгаа Уилшир харууллаа.  Арсеналд байрь сууриа эзэлж аваад зогсохгүй Английн шигшээд ч Жек тодорхой хэмжээнд үнэлэгдэж эхэлсэн. Жеррард, Лампард гэсэн нэгэн үеийн шилдэг хагас хамгаалагчдын нас нь явж, тэдний залгамж халааг хэн авах бол гэж санаа зовж байсан Англичуудын зовнилыг Жек алга болгосон.

Одоо “Гурван Арслангууд” Уилшир, Харт, Леннон, Тео гээд залуустайга ирээдүйг өөдрөг харж байна. Нас бага ч гэсэн жинхэнэ лидерийн араншинтай гэж Уилширийг алдартай тоглогчид магтаж байгаа. Англи одуудыг байнга ээрдэг “биеэ тоох” өвчин халдчихгүй л бол Уилшир ойрын хэдэн жилд жинхэнэ төгс тоглогч болж дэвших болно.

АРСЕНАЛЫН УЛИРЛЫН ШИЛДЭГ ТОГЛОГЧ

ЖЕК УИЛШИР

ГУРВАН ҮГЭЭР : АНГЛИЙН, АРСЕНАЛЫН ИРЭЭДҮЙ

УЛИРЛЫН ОНЦЛОХ ҮЙЛ ЯВДАЛ : Барсаг 2 : 1-ээр буулган авахад талбайн төвд тун гайхалтай тоглож багийнхаа довтолгоог эхлүүлж байсан.

Холбоотой нийтлэлүүд :

“Барса”-гийн 2010/11 улирлын шилдэг тоглогч

“Ман Юнайтед”-н 2010/11 улирлын шилдэг тоглогч

“Челси”-гийн 2010/11 улирлын шилдэг тоглогч

***

“Интер Милан”-ны солилцоо наймаанд үнэлгээ өгөх нь

“AC Милан”-ны солилцоо наймаанд үнэлгээ өгөх нь

“Ювентус”-н солилцоо наймаанд үнэлгээ өгөх нь

“Барса”-н солилцоо наймаанд үнэлгээ өгөх нь

“Реал Мадрид”-ын солилцоо наймаанд үнэлгээ өгөх нь

“Юнайтед”-ийн солилцоо наймаанд үнэлгээ өгөх нь

“Ливерпуль”-н солилцоо наймаанд үнэлгээ өгөх нь

“Арсенал”-ын солилцоо наймаанд үнэлгээ өгөх нь

“Челси”-гийн солилцоо наймаанд үнэлгээ өгөх нь

“Ман Сити”-гийн солилцоо наймаанд үнэлгээ өгөх нь

“Арсенал”-ын 2010/11 улирлын шилдэг тоглогч, 8.9 out of 10 based on 15 ratings