МХБХолбоо АПУ ХК-тай хамтран жил бүр уламжлал болгон зохион байгуулдаг “Боргио Цом” тэмцээний 2011 оных эхлэхэд бэлэн боллоо. Энэхүү тэмцээн нь МХБХ-ноос зохион байгууллагддаг дээд зэрэглэлийн хоёр тэмцээний нэг бөгөөд оролцогчдын тоо жилээс жилд өсөж байдаг билээ.

Энэ жилийн тэмцээний нэгээхэн онцлог нь цомын тэмцээний мөн утгаар зохион байгуулагдаж байгаагаар тодорхойлогдож байна. Оноолтоор таарсан 2 баг 2 тоглолтын дүнгээр ялсан баг нь дараагийн шатанд шалгарах юм. Мөн АПУ ХК энэ жилийн тэмцээний шагналын санг эрс өсгөсөн байна. Түрүүлсэн баг 5,000,000 төгрөг аман хүзүүдсэн баг 4,000,000 төгрөг, 3-т орсон буюу хагас шигшээд хожигдсон 2 баг тус бүр 1,500,000 төгрөгний эзэн болно.

Шагналын сан өсөхийн зэрэгцээ тамирчдын тоглох боломжийг ихэсгэх үүднээс оройн цагуудыг сонгож байгаа тул хөгжөөн дэмжигчид олноор хүрэлцэн ирж үзэх сайхан орчин бүрдэж байна. Лигийн багууд, сонирхогчдын багууд хоорондоо сугалаагаар хүч үзэх энэхүү тэмцээнд сонирхогчийн баг эхний 4 байранд шалгарч чадаагүй тохиолдолд хамгийн сайн үзүүлэлттэй сонирхогчийн багийг 1,000,000 төгрөгөөр шагнахаар МХБХолбоо шийдвэрлэсэн байна. Гэвч сугалаагаар нэг сонирхогчийн баг эхний 4-т үлдэх сайхан боломж бүрдлээ.

Мөн удахгүй болох Мъянмарын шигшээ багтай тоглох манай шигшээ багийнхан энэхүү тэмцээнд оролцохгүй ажээ. Шигшээ багийн хариуцлагатай тэмцээн ойртсон болон бэртэл гэмтлээс урьдчилан сэргийлсэн байна.

Нийт 22 баг оролцох “Боргио Цом-2011” тэмцээний нээлтийн ажиллагаа 2011 оны 6 дугаар сарын 12-ны Ням гарагийн 16,00 цагаас эхлэх бөгөөд МХБХ-ноос үзэгчдийн дунд сонирхолтой тэмцээн явуулж бөмбөг, хэрэгслэлээр шагнахаар болжээ. Нээлтийн ажиллагааны дараа хамгийн анхны тоглолт энэ жилийн Нийслэл лигийг өнгөлж яваа “Хоромхон” /Сүхбаатар дүүрэг/ клуб, сонирхогчийн “Вестерн” багтай хүч үзнэ. Сонирхогчдын багуудын дунд бас чамлахааргүй амжилттай тоглодог “Вестерн” клуб лигийн хүчирхэг багийг хожиж чадах уу гэдэг асуултын хариуг та МХБХ-ны ногоон талбай дээр ирж үзээрэй.

“Боргио Цом-2011” тэмцээний цомыг хүртэгч 2011 оны 7 дугаар сарын 09-ны өдөр орой дээрээ өргөх болно.