Формула-1-ийн сонирхолтой уралдаануудын жагсаалтанд зайлшгүй тэмдэглэгдэн үлдэх Монтреалийн уралдаан  4 цаг үргэлжилж, Макларений Женсон Баттон сүүлийн тойрогт Феттелээс ялалтыг нь булааж чадав.

Баттоны хувьд уралдаан адал явдлаар дүүрэн байлаа. Багийн хамтрагч Хэмилтонтой бас  Ферраригийн Алонсотой мөргөлдөж, дугуйгаа хагалж, зогсоолоор өнгөрөх торгууль хүртэж, 5 удаа зогсолт хийсэн боловч сүүлийн тойрогт Феттелийн алдааг ашиглан түрүүлж чадсан юм.

 

Багууд болон нисгэгчид Баттоныг барианы шугам давж ялалт байгуулах хүртэл ийм урт сунжирсан уралдаан болно гэж тооцоогүй.

 

Гараа Safety Car –тай эхэлсэн бөгөөд 5 дахь тойргоос уралдаан хэвийн явагдаж эхлэсэн юм. Себастьян Феттель уралдааныг тэргүүлж нэхэгчдээс аажмаар холдож байв.  Хэмилтон Марк Уэбберийг ширүүнээр    дайрахдаа мөргөж Уэббер  нилээд хэдэн байрлал алдаж ухрав. Харин Хэмилтоны энэ үйлдэлд торгууль оноосонгүй. Үүний дараа  тэрээр Шумахертай тулалдах  үедээ гулгаж замаас гарах агшинд  Баттон түүнийг  гүйцэв.  Гараа барианы шулуун хэсэгт Хэмилтон  Баттоноос алдсан байрлалаа эргүүлэн авхаар зүүн талаар нь  гүйцэх оролдлого хийх үед  Баттон зүүн тийш шахсанаар  Хэмилтон хана мөргөж дугуй нь хагарав. Тэрээр зогсоол руу зүглэсэн боловч замдаа машинаа орхихоос өөр аргагүй болж дахин Safety Car гарч ирлээ. Макларений хоёр нисгэгчийн тулаанд хэн буруутайг нь хэлэхэд бэрх байв. Уралдааны дараа зарим мэргэжилтнүүд Хэмилтоныг хэтэрхий түрэмгий гүйцэх оролдлого хийж байгааг шүүмжилсэн юм. Харин Баттон түүнээс уучлалт хүссэн гэжээ. Safety Car –ийн үеэр Баттон  Intermediates (хагас борооны) дугуйг сольж авав. 13 дахь тойргоос уралдаан дахин хэвийн явагдаж эхлэхтэй  зэрэгцэн бороо бага зэрэг ширүүсэв. Баттон Safety Car-ийн үед хурд хэтрүүлсэн тул зогсоолоор өнгөрөх торгууль хүртэв. Тэр үүнийг даруй биелүүлж зам дээр 15-р байрлалд эргэн иржээ. Гэхдээ тэрээр Intermediates дугуй сольсон нь онож хэд хэдэн байрлал ахиж чадав. Тэр тэргүүлэгч Феттелээс 1 секундээр хурдан байв. Нисгэгчид ээлж дарааллан Intermediates дугуйг сольж байв. Харин Феттель борооны дугуйгаа солилгүй уралдаанаа үргэлжлүүлж байлаа. Энэ хооронд бороо ширүүсэж дахин Safety Car зам дээр гарч ирлээ. Дөнгөж саяхан Intermediates буюу хагас борооны дугуй сольсон нисгэгчид эргээд борооны дугуйгаа сольж эхлэв. Гэвч уралдаан цааш үргэлжлэх боломжгүй болов.

Бороо ширүүсэж  байсан учир улаан дарцаг үзүүлж уралдааныг түр хугацаанд завсарлуулав. Ингээд хоёр хэсэг хуваагдсан уралдааны эхний хэсэг 25 тойрог үргэлжилсэн юм. Энэ хооронд багууд машиндаа засвар хийж, дугуйгаа сольж авав. Бороо улам ширүүсэж уралдаан мөд эхлэх боломж олгохгүй байв. Удаан завсарласаны эцэст гараа Safety Car-тай эхэллээ. 34 дэхь тойрогт Safety Car орж 35  дахь тойргоос уралдаан дахин эхлэв. Борооны дугуйтай бүх нисгэгчид эргээд хагас борооны дугуйгаа сольж байв. 37 дахь тойрог Алонсо  Баттонтой мөргөлдсөнөөс болж  дахиад Safety Car гарч ирлээ. Алонсо машинаа орхиж  Баттон дугуйгаа солин цаашаа уралдах болов. Гэхдээ тэр хамгийн сүүлийн байрлалд зам дээр гарч иржээ. 41 дэх тойрогоос уралдааныг эхлүүлэв. 48 тойргын дараахи байдлаар Феттель , Кобаяаши, Масса , Шумахер нар уралдааныг хошуучилж байв. Зам аажмаар хатаж уралдагчдаас хамгийн түрүүнд Баттон, Алгуэсуари болон Мальдонада нар энгийн дугуйг сольж авлаа. Ник Хайдфельд  Кобаяашитай мөргөлдөж машиныхаа хамраас салж уралдааныг орхисон бол Кобаяаши уралдаанаа цаашаа үргэлжлүүлэв. Ийнхүү 56 дахь тойрогт дахиад Safety Car гарч ирэн уралдагчдыг хошуучлах болов. 60 дахь тойргоос уралдаан дахин эхэллээ. Феттель уралдааныг тэргүүлсээр. Гэхдээ Баттон бусдаас онцгой хурдалж байв. Тэрээр Шумахер болон Уэббер нарыг нэхсээр ойртож чадав. Ингээд гурвалсан тулаан өрнөлөө. Шумахер өөрийн байрлалаа чадах чинээгээрээ хамгаалж байв. Уэббер замыг товчилж түүнийг гүйцсэн боловч дүрмийн дагуу байрлалаа эргүүлэн өглөө. Баттон Уэбберийг гүйцэж, тун удалгүй Шумахерийг ардаа орхив.

Гайхалтай , тэр хоёр ч удаа мөргөлдсөн мөн торгууль хүртсэн хамгийн сүүлийн байрлалд явсан билээ. Уралдаан дуусхад 4 тойрог дутуу байхад Баттон Феттелээс 1,6 секундын  зайтай болов. Уэббер Шумахерийг гүйцэж 3т орж ирлээ. Баттон Феттелийг мөшгисөөр. Сүүлийн тойрогт  Феттель эргэлт дээр алдаа гаргаж замаас хазайх агшинд Баттон түүнийг гүйцэж хошуучилж эхэллээ. Дэлхийн аварга Феттель 69 тойргын турш алдаагүй явсан бөгөөд сүүлийн тойрогт байж боломгүй алдааг хийв. Баттон барианд орсоноор  улирлын анхны түрүүгээ авлаа. Феттель хоёрдугаарт, Уэббер гуравдугаарт барианд оров. Феттельд 7 дахь уралдаанд 6 дахь ялалтаа авхад хоёрхон километр дутав.Михаэль Шумахер Формула-1д эргэн ирсэнээс хойшхи хамгийн шилдэг уралдаанаа хийсэн нь энэ байлаа.  Кобаяаши барианы шугам дээр Массад зургадугаар байраа  алдав.

Уралдааны дараа Женсон Баттон “ Энэ бол миний хамгийн шилдэг ялалт” гэж онцолсон юм.

 

Уралдааны дүн

1.	Ж. Баттон	McLaren	70	4:04:39.537	7	25
2.	С. Феттель	Red Bull	70	+2.7 сек	1	18
3.	М.Уэббер	Red Bull	70	+13.8 сек	4	15
4.	Михаэль Шумахер	Mercedes	70	+14.2 сек	8	12
5.	В.Петров	Lotus Renault	0	+20.3 сек	10
6.	Ф.Масса	Ferrari	70	+33.2 сек	3	8
7.	К.Кобаяши	Sauber	70	+33.2 сек	13	6
8.	Х.Алгуерсуари	Toro Rosso	70	+35.9 сек	18	4
9.	Р.Баррикелло	Williams	70	+45.1 сек	16	2
10.	С.Буэми	Toro Rosso	70	+47.0 сек	15	1
11.	Н.Росберг	Mercedes	70	+50.4 сек	6
12.	Педро де ля Роза	Sauber	70	+63.6 сек	17
13.	В.Льюцци	HRT	69	+1	21
14.	Ж.Амброзио	Virgin	69	+1	24
15.	Т. Глок	Virgin	69	+1	22
16.	Я.Трулли	Team Lotus	69	+1	19
17.	Н.Картикеян	HRT	69	+1	23
18.	Пол ди Реста	Force India	67		11
	П.Мальдонадо	Williams	61		12
	Н.Хайдфельд	Lotus Renault	55		9
	А.Сутил	Force India	49		14
	Ф.Алонсо	Ferrari	36		2
	Х. Ковалайнен	Team Lotus	28		20
	Л.Хэмилтон	McLaren	7		5

 

Нисгэгчдийн оноо

1. С.Феттель		Red Bull	161
2. Д.Баттон		McLaren	101
3. М.Уэббер		Red Bull	94
4. Л.Хэмилтон		McLaren	85
5. Ф.Алонсо		Ferrari	69
6. Ф.Масса		Ferrari	32
7. В.Петров		Renault	31
8. Н.Хайдфельд		Renault	29
9. М. Шумахер		Mercedes	26
10. Н.Росберг		Mercedes	26
11. К. Кобаяши		Sauber	25
12. А.Сутил		Force India	8
13. С.Буэми		Toro Rosso	8
14. Х.Альгерсуари		Toro Rosso	4
15. Р.Баррикелло		Williams	4
16. C.Перес		Sauber	2
17. П. ди Реста		Force India	2
18. П. де ла Роса		Sauber	0
19. Я.Трулли		Team Lotus	0
20. В. Лиуцци		HRT	0
21. Ж. Д’Амброзио		Virgin Racing	0
22. Х.Ковалайнен		Team Lotus	0
23. Т.Глок		Virgin Racing	0
24. П.Мальдонадо		Williams	0
25. Н. Картикеян		HRT	0

Зохион бүтээгчдийн цом

1. Red Bull		255
2. McLaren		186
3. Ferrari		101
4. Renault		60
5. Mercedes		52
6. Sauber		27
7. Toro Rosso		12
8. Force India		10
9. Williams		4
10. Team Lotus		0
11. HRT		0
12. Virgin Racing		0

 

Канадын гран при: Баттоны гайхалтай ялалт, 8.0 out of 10 based on 6 ratings