2010/11 улирал эхлэхийн өмнө Реал хөл хөдөлгөөн ихтэй байлаа. Өмнөх жилүүдийн адил арилжаа наймаанд хөрөнгө мөнгө харамгүй цацсан ч наймааны бодлого арай өөр чиглэлтэй байлаа. Флорентино Перес, Хорхе Валдано нар 70, 80 саяар супер одод авчрах бус ирээдүйтэй, залуу авьяастууд руу “овоо хараагаа” чиглүүлсэн. Өмнөд Африкийн ДАШТ-аар тодорсон Месут Өзил, Сами Хедира, Ди Мария гээд шижигнэсэн залуусаар “цусаа сэлбэсэн” нь ирээдүйгээ харсан тун зөв алхам байлаа.

Гэхдээ энэ олон оддыг хэн эмхэлж, нэг зорилгын төлөө нэгтгэж чадах билээ. Мэдээж хэрэг амжилтын ангууч Жосе Моуриньо байлгүй яахав. Интертэй хамт авч болох бүхнийг хамсан амбицтай “Онцгой нэгэн” мэдээж Реалын саналаас татгалзах шалтгаан байгаагүй. Барсагийн ноёрхлыг унагаж Реалд алдар нэр, цом, шагналыг эргүүлэн авчирна гэж тэр амласан. Яахав эхний оролдлогоороо тэр бүгдийг хийж чадсангүй. Гэхдээ Реал энэ жил үнэхээр сайн “үзэлцэж” чадсан гэдэгтэй хэн ч маргахгүй. Тэд “Эзэн хааны цом”-д түрүүлж нэг цомтой улирлыг дуусгаж байна. Харин дараа жил гурван цомын төлөө тоглох нь тодорхой. Өнгөрч буй улиралд хэн нь Реалын шилдэг нь байв гэдгийг сонжицгооё.

1. Рикардо Карвалью (Хамгаалагч)

Нас : 32

Тоглолт : 46

Гоол/дамжуулалт : 3/0

Шар/улаан хуудас : 12 2

Карвальюг авах нь Реалын нэн тэргүүний зорилго байгаагүй. “Эзэн хааны баг”-ын авах тоглогчдын жагсаалтанд тэрээр “Интерийн Майкон болон АС Миланы Тьягу Силвагийн  ард бичигдэж байлаа. Гэвч Моуриньогийн хувийн ятгалга амжилтанд хүрч экс-багийн андаа Мадридад газардуулж чадсан юм.

Үнэнийг хэлэхэд Карвальюд тийм их найдвар тавьж байсан Реалын фенүүд цөөхөн л байсан. Гэхдээ 14 жилийн туршлагаа ашиглан Карвалью  Реалын ар талаар салхи сийгэж байсан “цоорхой”-г бөглөж тэдний гол сул талыг  нөхсөн  юм. Түүний ачаар Икер Касильяс илүү тайван байх болж, хамгаалалтын алдаанаас болж дэмий гоол алдах нь багассан. Мөн тэрээр довтолгоонд ч сайн оролцож гурван гоол оруулаад амжсан байгаа.

2. Месут Өзил (Хагас хамгаалагч)

Нас : 22

Тоглолт : 50

Гоол/дамжуулалт : 10/22

Шар/улаан хуудас : 2/0

Өзил бол Зинедин Зиданаас хойш Реалд үгүйлэгдэж байсан найруулагч гэдгийг нь байнга онцолж байгаа. Герман залуугийн Бернабеу дэх эхлэл тийм ч сэтгэл хөдөлгөм байгаагүй. Гэхдээ 10 сараас эхлэн Өзил жинхэнэ тэсэрч баруун солгойгүй дамжуулалт өгч эхэлсэн. Улирал дуусахас түүний өгсөн гоолын дамжуулалт альхэдийнэ 20 гарсан байлаа. Оруулсан гоол нь ч тийм бага биш. К.Роналдугийн рекорд эвдсэн олон гоол оруулсны гол шалтгаан гол Өзил гэдэгтэй маргах хүн цөөхөн байх. Өзилийн Реалын домог болох замаар алхаж байна.

3. Криштиану Роналду (Хагас хамгаалагч)

Нас : 26

Тоглолт : 51

Гоол/дамжуулалт : 46/13

Шар/улаан хуудас : 7/0

Эрчээ авсан “хуй салхи” адил К.Роналдуг зогсоох хэн ч энэ улиралд байсангүй.  Португалын супер од Реал дахь эхний улиралдаа 35 тоглолтонд 33 гоол оруулж шуугиан дэгдээж байсан бол энэ жил юу гээч. Тэр 54 тоглолтонд 53 гоол бөмбөгдөж орхилоо. Ла лигийн түүхэнд  ингэж “галзуурч” байсан довтлогч  нэгээхэн ч байсангүй. Үүнийг хийхдээ зургаан хет-трик, хоёр покер багтаажээ.

Мэдээж хэрэг ийм гайхалтай байсныхаа ачаар Роналду Европын алтан шаахайг 80 оноотой хүртсэн. Өмнө нь МанЮ-д байхдаа Рон 2008 онд энэ шагналыг авч байсан  бөгөөд хоёр өөр багт “Алтан шаахай” авсан анхны тоглогч боллоо. Хэрвээ ийм гайхалтай улирал нь цомгүй өндөрлөсөн бол үнэхээр харамсалтай байх байв. Харин Эзэн хааны цом түүний баяр дээр давхар баяр нэмсэн бизээ.

РЕАЛ МАДРИДЫН 2010/11 УЛИРЛЫН ШИЛДЭГ ТОГЛОГЧ

КРИШТИАНУ РОНАЛДУ

ХОЁР ҮГЭЭР : “ГООЛЫН МАШИН”

УЛИРЛЫН ОНЦЛОХ ҮЙЛ ЯВДАЛ : “ЭЗЭН ХААНЫ ЦОМ”-ЫН ФИНАЛД БАРСАГИЙН ХААЛГАНД ГООЛДОЖ РЕАЛЫН ЦОМГҮЙ ЖИЛҮҮДИЙГ ТӨГСГӨЛ БОЛГОВ

Холбоотой нийтлэлүүд :

“Барса”-гийн 2010/11 улирлын шилдэг тоглогч

“Ман Юнайтед”-н 2010/11 улирлын шилдэг тоглогч

“Челси”-гийн 2010/11 улирлын шилдэг тоглогч

“Арсенал”-ын 2010/11 улирлын шилдэг тоглогч

“Ливерпуль”-н 2010/11 улирлын шилдэг тоглогч

 

 

 

“Реал Мадрид”-ын 2010/11 улирлын шилдэг тоглогч , 8.9 out of 10 based on 18 ratings