Английн премьер лигийн ирэх улирлын хуваарь зарлагдлаа.  Аваргаа хамгаалах Манчестер Юнайтед эхний тулаанаа 8 сарын 13-нд Вэст Бромвичийн талбайд хийх болжээ. Харин шинээр лигт дэвшсэн Соунси сити Манчестер ситигийн аманд очиж буй аж.

Юнайтедийн хувьд нээлтийн тойрог амар байх боловч дараагийн тоглолтоо  Тоттенхэм, Арсенал гэсэн Лондоны хоёр “аварга загас”-нуудтай хийх учраас бэлтгэлтэй байх хэрэгтэй. МанЮ-гийн улирал 5 сарын 13-нд Сандерлэндийн талбайд дуусна.

Ирэх жил аваргын төлөө тэмцэнэ хэмээж буй Арсеналын Буучид хатуухан хуваарь татлаа.  Тэд нээлтийн тоглолтоо нилээд зайтай байдаг Ньюкэсл хотод хийх бөгөөд дараа нь Олд Траффордод зочлохын өмнө Ливерпулийг талбайдаа хүлээж авах аж.

Өнгөрсөн улирлын аман хүзүү Челси Сток Ситигийн талбайд эхний тоглолтоо хийснээр улирлыг эхлүүлнэ. Улмаар Стемфорд Брижэд  Вэст Бромвичтэй тулна.

Ливерпулийн тухайд Сандерлэндийг Энфилдэд угтаж авах юм. Копуудын шинэ цэрэг Жордан Хендерсон хуучин багийнхаа андуудын эсрэг анхны тоглолтоо хийх боллоо.  Стивен Жеррард энэ талаар

“Эхний тоглолтыг талбайдаа хийнэ гэдэг сайн хэрэг. Гэхдээ санаа амарч болохгүй. Нээлтийн тоглолтоос улирлын өнгө харагдах учраас маш сайн бэлтгэх хэрэгтэй. Эхний 3 оноогоо авчих юм бол сэтгэл санаа ч сайхан болно. Дараа нь Арсеналын талбайд хүнд хэцүү тоглолт хийх болохоор өмнө нь заавал хожих хэрэгтэй”  гэжээ.

Энд дарж ирэх улирлын хуваарийг үзнэ үү