Бразил довтлогч Графите Арабын нэгдсэн Эмират улсын  “Аль Ахли” багтай хоёр жилийн гэрээ байгууллаа. Өдгөө 32 настай тэрээр 2009 онд Вольфсбургийг Бундеслигийн аварга болоход Эдин Жекотой гайхалтай хослол үүсгэж лигийн мэргэн бууч болж байсан. Гэвч Арабын багаас ирсэн өндөр цалинтай гэрээний саналаас татгалзаж чадсангүй.

“Миний насны хүн гэр бүлээ бодохгүй бол болохгүй шүү дээ. Тэдний өмнө би хариуцлага хүлээсэн болохоор ийм шийдвэр гаргасан нь зөв гэж бодож байна. Карьераа дуусгасныхаа дараа амьдралаа зохицуулахад ч илүү дөхөм болно байх”

“Вольфсбургт миний карьерийн гайхалтай он жилүүд өнгөрсөн. Намайг дэмжиж туслаж байсан бүх хүмүүстээ маш их баярлалаа”

2009 онд Вольфсбург түрүүлэхэд  Графите 29 гоол оруулж Германы оны  шилдэг тоглогч болж байсан. Харин өнгөрсөн улиралд тэрээр ердөө 9 гоол оруулж баг нь доод лиг рүү унахын даваан дээр аврагдсан билээ.