Японы сүмо бөхийн холбооноос хоёр тэмцээн завсарласны эцэст башё зохион байгуулахаар болоод байгаа билээ. “ЭН ЭЙЧ КЭЙ” телевиз долдугаар сарын тэмцээнийг шууд дамжуулан үзүүлэхээр болсон ч Нагоя башёгийн тасалбар зарагдахгүй хүнд байдалд ороод байгаа гэнэ. Тасалбар зардаг “Сүмо аннайжёо”- гоос мэдээлснээр тэд цэгээ цөөлж байгаа гэнэ. “Сүмо аннайжёо”-гийн төлөөлөгч “Улс орны эдийн засгийн байдал хэцүү байгаа болохоор хэчнээн хичээлээ ч орлого орохоо болилоо. Жил ирэх тусам л сүмо үзэгчид цөөрөөд байна” хэмээн халаглажээ. Өнгөрсөн жилийн Нагоя башёгийн үзэгчдийн тоо бейсболын бооцооны хэргийн улмаас өмнөх жилийнхээсээ 9400-аар багасжээ. Харин энэ жил найрааны хэргээс болж, тасалбар зарж эхлэх хугацаа хойшилсноос үзэгчдийн тоо улам буурах төлөвтэй. “Сүмо аннайжёо”-гоос тасалбар худалдан авсан хүнд урамшуулал олгох зэрэг олон төрлийн арга хэмжээ авч байгаа ч байдал хүнд хэвээр. Японы “Сүмо” сэтгүүлийн сурвалжлагч “Сүүлийн гурван жилд хүүхдээ дагуулаад сүмо үздэг хүн их цөөрсөн. Орчин үеийн залуус өөр юм сонирхож байна. Харин Японы соёл дурсгалын нэг хэсэг гэсэн утгаар музей үзэж байгаа юм шиг л ирдэг гадаадынхан их болж байна” гэж ярьсан байна. Долдугаар сарын 10-нд эхлэх Нагоягийн тэмцээнийг хэдэн хүн үзэхээс сүмогийн ертөнцийн хувь заяа шийдэгдэж магадгүй болоод байна. Энэ сарын 26-нд бөхчүүл Нагоя хотод очиж, 27-нд нь банцүкэ гарна. Харин 28-ний өдөр бөхчүүдийн хурал болох бол, долдугаар сарын 4-нд шинэ бөхийн үзлэгтэй.