NHL-ийн хурц оддын нэг Евгений Малкин доорх сонирхолтой ярилцлагыг өгчээ.

-Та телевизийн нэвтрүүлэг хэр их үздэг вэ. Хүндэлдэг хөтлөгч бий юү?

-Оросынхоо телевизүүдийг үздэг. Гэвч Америкт байгаа гэрт маань хоёрхон суваг байдаг. Нэг нь хөгжмийнх, нөгөө нь Нэгдүгээр суваг. “Пусть говорят” нэвтрүүлгийг үзэх дуртай. Хөтлөгч Малахов нэвтрүүлгээ мэргэжлийн түвшинд удирдаж чаддаг.

-Тэгвэл NHL-ийн ямар хоккейчныг хүндэтгэдэг вэ?

-Бага байхын “Детройт” клубийг дэмжиж ирсэн. Түүний “Колорадо”-той хий сэн хоёр тоглолтуудыг үзээд шүтдэг болсон. Мэдээж, Федоров, Фетисов нарын орос залуус тэнд байсан нь надад нөлөөлсөн.

-Таны сэтгэлд хүрсэн хамгийн гоё гоолыг хэн оруулсан бэ?

-Овечкин газар унаж байхдаа “Финикс”-ийн хаалганд оруулсан гоол хам гийн гоё нь. Тэр гоолыг хэн ч давтаж чадахгүй.

-Танд тавьсан хамгийн тэнэг асуулт юу байв?

-Хэзээ англи хэл сурах вэ?

-Яагаад тэнэг асуулт гэж?

-Яагаад гэвэл үүнд хариулах хариулт надад байхгүй.

-Спортоо орихисон оддоос хэнтэй хамт нэг тавтад тоглохыг хүсч байна?

-Марио Лемье спортоо орхисны дараа “Питтсбург”-т очсоноороо би азгүй хүн. Хамгийн түрүүнд түүнтэй хамт тогломоор байна. Тэр бол сайн эр хүн. Одоо удирдагч болсон ч гэлээ миний ахуйн амьдралд анхаарал их тавьдаг. Түүнээс ийм халамж авах сайхан санагдсан.

-Хоккейноос өөр ямар спортод сайн бэ?

-Пинг понг. Магнитогорск хотын талбайд ширээний теннисний хэдэн ширээ байдаг байсан. Би сайн техникгүй ч гэлээ бөмбөгийг бол муугүй цохиод байна.

-Стэнлийн цом, олимп хоёрын аль нь танд чухал вэ?

-Стэнлийн цомыг хүртэж үзсэн болохоор олимпийн аварга болох чухал байна. Энэ мөрөөдлөө Сочигийн олимпод гүйцэлдүүлнэ гэдэгт найдаж байгаа. Гэхдээ Стэнлийн цомыг дахиад нэг хүртчихийг хүсч л байна.

-Канад, Америкийнхний танаас асуудаг хамгийн түгээмэл сэдэв юу вэ?

-Орост мафи бий юү гэж асуудаг. Хамгийн сонирхолтой нь, “Тэд буу агсаад гудамжаар явдаг уу” гэдэг. Мафийн тухай бүх асуудал тэдэнд сонирхолтой санагдаг юм билээ. Ялангуяа Оросын 90-ээд оны үеийн үйл явдлын талаар их шалгаадаг.

-NHL-ийн хамгийн бохир тоглолттой хоккейчныг нэрлээч?

-Эйври, Рууту хоёр. Тэд тоглолтын турш хэн нэгний араас элдэж байдаг. Тэгж явснаараа цэнэг авдаг шиг байгаа юм.

-Мэтт Кук гэж танхай этгээдийн талаар юу хэлэх вэ?

-Тэр манай багт тоглож байгаа. Тиймээс бид азтай улс. Хүний уур хилэнг бадрааж чаддагаараа тэр алдартай. Кук манайд ирснээр багийн тоглолт сайжирч, улмаар аварга болсон шүү.

-Өнөө цагийн шилдэг тавтыг нэрлээч. Хаалгачийн хамт?

-Хаалгач-Тим Томас, хамгаалагч-Лидстрем, Хара, Довтлогч-Овечкин, Кросби, Дацюк. Лидстрем шилдэг хамгаалагчаар долоон удаа шалгарсан бол Хара тоглолт бүрт гучаас дээш минут тоглоод огт ядардаггүй.

-Аль хамгаалагчийн эсрэг тоглоход хэцүү байдаг вэ?

-Хара. Тэрбээр урт мөч, цохиурынхаа хүчээр өрсалдөгчөө тоглолтоос шууд гаргадаг. Мөн Лидстремийг хэлэх хэрэгтэй. Чамайг шайб авуут л тэр шууд цохиод холдуулчихдаг.

Орчуулсан Ж.БАЯРЖАРГАЛ

Е.Малкин: Оросын мафийн талаар их асуудаг, 10.0 out of 10 based on 1 rating