Аргентиний аварга цолыг саяхан хүртсэн “Велез Сарсфилд” клуб түлхүүр тоглогчоо Интерт зарахаар боллоо. Рики Алварезийг тэд 11.8 сая еврогоор Италийн аваргуудад зарж байгаа ажээ.

Интер Алварезийг эзэмших эрхийн 90 хувийг худалдаж авсан бөгөөд үлдсэн 10 хувь буюу 1 сая еврогийн төлбөрийг 80 тоглолт хийснийх нь дараа төлөхөөр болжээ.

Италийн La Gazzetta dello Sport  сонинд энэ наймааны талаар мэдээлсэн бөгөөд Интерийн албан ёсны сайтад тун удахгүй мэдээлэх ажээ.

Шинэ багтаа Алварез 5 жилийн урт хугацааг өнгөрүүлэх бөгөөд жилийн 1.8 сая еврогийн төлбөр авах ажээ.

Интерийн шинэ дасгалжуулагч Жьян Пьеро Гасперини улирал эхлэхийн өмнө бүрэлдэхүүнээ сайжруулахаар идэвхитэй ажиллаж байгаа.

Харин түүний анхны наймаа Алварез боллоо. Өдгөө 23 настай Алварез шигшээ багтаа хараахан дуудагдаж амжаагүй байгаа юм. Түүнийг Италийн Рома, Английн Арсенал багууд мөн сонирхож байсан.