Бразилийн Сан Паулу клуб Арсенал багийн тоглогч Денилсонг нэг улирлын хугацаатай зээлээр тоглуулахаар боллоо. Клуб энэ тухай албан ёсны мэдээллийг өнөөдөр зарлах бөгөөд клубын шинэ дасгалжуулагч Батистагийн анхны наймаа нь энэ гэнэ. 2006 онд Бразилаас их итгэл найдварыг тээн Лондонг зорьсон 23 настай Денилсон карьерийн эхэнд муугүй тоглож байсан ч өнгөрсөн улиралд ердөө зургаахан удаа гараанд гарсан билээ. Ингээд тэр багаас явах хүсэлтэйгээ илэрхийлээд байсан юм. Денилсон Сан Паулуд ирж байгаадаа туйлын баяртай байгаа гэнэ. “Би төрөлх нутагтаа эргэн ирж байгаадаа баяртай байна. Би энд төрж өссөн, хөлбөмбөг сурсан. Манай гэр бүл бүгд энд байдаг. Би мөрөөдлөөрөө амьдарч байна” гэж өгүүлжээ.