35 сая фунтээр Манчестер Ситигийн эгнээнд нэгдсэн Серхио Агуеро Англи маягийн амьдралд хурдан дасна гэдэгтээ итгэлтэй байна. Тэрээр шигшээ багийн анд Карлос Тевесийн орон зайг нөхөхөөр Манчестерт газардсан. Харин Тевесийн багаас явах асуудал гацаанд ороод байгаа   учраас ирэх улиралд эдгээр довтлогчид хамтдаа талбайд гарч ч болно.

Агуерог  Манчестерт ирэхэд шигшээ багийн анд Пабло  Сабалета хамгийн их нөлөөлсөн ажээ. Ситигийн албан ёсны сайтад өгсөн ярилцлагадаа тэрээр ” Сабалета  надад энэ багийн талаар эерэг зүйлс ярьж өгсөн. Багийн бүрэлдэхүүн болон, уур амьсгалыг маш таатай гэж хэлсэн болохоор би энд ирэхээр шийдсэн” хэмээжээ.

“Премьер лиг тоглох нь миний мөрөөдөл байсан. Тийм болохоор агентуудаасаа чадах бүхнээ хийхийг хүссэн. Тэд ч миний итгэлийг алдалгүй энэ хэлэлцээрийг бодитой болгож чадлаа”

Мөн өөрийн гэр бүлийн талаар. “Тэд надтай хамт нүүж ирсэн. Бидний таньдаг найзууд энэ хотод цөөнгүй бий. Тийм болохоор уйдахгүй байх. Бас Макситай (Родригез)-тэй холбоотой байгаа. Эндхийн амьдралд хурдан дасна гэдэгтээ итгэлтэй байна”. гэжээ. Агуерогийн эхнэр Жианнина ,Диего Марадонагийн охин гэдгийг та бүхэн мэдэх байх. Хосууд Бенжамин хүүтэйгээ хамт амьдардаг.

Энэ хооронд Атлетико Мадрид багийн ерөнхийлөгч Энрике Черезо одоо болтол Агуерог ийм зам сонгосонд гайхсаар байгаагаа нуусангүй. “Энэ асуудал нэг тийшээ болсон гэдгийг мэдэж байна л даа. Гэхдээ яагаад түүнийг ийм шийдвар гаргасанд гайхаж л байна. Ирэх улирлыг Агуерогүй эхлүүлнэ гэхэд бас эвгүй л санагдаж байна”

Өдгөө 23 настай Агуеро Манчестерийн багтай  5 жилийн гэрээ байгуулсан. Шинэ багтаа тэрээр 16 дугаарыг зүүх юм.