Жүдо бөхийн үндэсний шигшээ багийн тамирчин, Хөдөлмөрийн баатар Х.Цагаанбаатарыг “Оюутолгой” компани 2012 оны Лондоны олимпийн “Элч”-ээрээ сонгожээ.

Энэ тухайгаа тус компанийн ТУЗ-ийн дарга Г.Батсүх, гүйцэтгэх захирал Камерон МакРей нар өчигдөр зарлав. Ингэснээр Х.Цагаанбаатарын Лондоны олимпийн наадамд оролцох бүх зардлыг “Оюутолгой” ивээн тэтгэх юм.

Тус компанийн ТУЗ-ийн дарга Г.Батсүх энэ үеэр “Манай хамт олон 2012 онд уурхайгаа ашиглалтад оруулахын төлөө цаг мөч бүртэй уралдан ажиллахдаа Цагаанбаатарыгаа олимпоос алтан медаль авчраасай хэмээн залбирч, дотоод хормойгоо мушгин хүлээх болно” гэж ярилаа.