Чөлөөт бөхийн өсвөрийн Азийн АШТ энэ сарын 4-7-нд Тайландын нийслэл Бангкок хотноо явагдаж өндөрлөлөө. Гурван төрлөөр зохиогдсон энэхүү тэмцээнд хөвгүүд 42, 46, 50, 54, 58, 63, 69, 76, 85, 100, охидууд 38, 40, 43, 46, 49, 52, 56, 60, 65, кг-ын жинд аваргаа тодруулав. Манай улсаас эрэгтэй найм, эмэгтэй есөн бөх Тайландын дэвжээнд хүч сорьж, нэг алт, дөрвөн мөнгө, хоёр хүрэл медаль хүртсэн сайхан амжилт үзүүлжээ.

Эрэгтэйчүүдээс 50 кгын жинд Өнөрбатын Бямбацогт (Дархан-Уул аймаг), 85 кг-ын жинд Энхбаатарын Төгөлдөр (Дархан-Уул аймаг) нар мөнгөн медаль, эмэгтэйчүүдээс 52 кг-ын жинд Алтанцэцэгийн Батцэцэг (Дархан-Уул аймаг) алтан медаль, 38 кг-ын жинд Ганболдын Мөнхцэцэг (Сэлэнгэ аймаг), 70 кг-ын жинд Цогсүрэнгийн Мөнхзул (Сэлэнгэ аймаг) нар мөнгөн медаль, 56 кг-ын жинд Хүрэлхүүгийн Болортуяа (Орхон-Уул аймаг), 65 кг-ын жинд Бүрнээбаярын Нямгэрэл (Орхон-Уул аймаг) нар хүрэл медаль хүртсэн байна.

Манай эрэгтэй баг 33 оноогоор наймдугаар байр эзэлсэн бол эмэгтэйчүүд 68 оноогоор гуравдугаар байр эзэлж, цом хүртжээ. Эмэгтэй чөлөөт бөх БАТЦЭЦЭГ нэртэй бас нэгэн аваргатай болсон нь сонин тохиолдол юм. Өнгөрсөн жил Сингапурын залуучуудын олимпоос Баатарзоригийн Батцэцэг алтан медаль хүртсэн бол намар нь болсон насанд хүрэгчдийн ДАШТ-д Соронзонболдын Батцэцэг аваргалсан билээ. Манай өсвөрийн бөхчүүд наймдугаар сарын 23-28-нд Унгар улсын Зомбатхей хотод болох өсвөр үеийн ДАШТ-нд оролцох юм байна.