Болт л ингэж чадна. Өрсөлдөөн буцалсан Дэгүгийн талбарт дэлхийн дээд амжилт шинэчлэгдэхгүй хэмээн өгүүлж байсан мөртлөө тэр 4х100 м-т рекордын “цаг”- ийг ажиллуулж чадлаа. Гар нийлсэн нөхөд Нестра Картер, Майкл Фратер, Йохан Блейк нарын хамт ийн алдрын оргилд нэрээ мөнхөлсөн нь бахдалтай.

Цаг хугацаатай уралдах спортын хатан хааны төрөлд дээд амжилт эвдэх нь хамгийн амттай байдаг. Тиймдээ ч “Дэгү-2011”-д дутаад байсан оргил амжилтыг гүйлтийн хурд, оновчтой тактикийн ачаар ямайкчууд гаргасан юм. Өөрөөр хэлбэл Франц, Сэнт-Киттс ба Невис, АНУ-ын гүйгчдийг “зажлалгүй залгиж”, 37,04 секундээр дэлхийн рекордыг дурайлгав.

Цэнхэр гаригийн хурдан хүний нөхөд спортын талбарт үүнээс ч өмнө орон зайгаа эзэлж амжсан юм. Н.Картер 100 м-т 9,8 секундээс дотогш гүйсэн дэлхийн таван тамирчны нэг бөгөөд “Бээжин-2008” олимпийн 4х100 м-ийн буухиад алтан медалиар энгэрээ мялаажээ. Тэгвэл М.Фратер 2005 оны ДАШТий 100 м-т “аман хүзүүдэж” байв. Ямайкийн шигшээ баг 4х100 м-ийн буухиад гурван жилийн тэртээ 37,10- аар дэлхийн дээд амжилт эзэгнэж байсан түүхтэй.