Германы шигшээ баг 4 хоногын өмнө Евро 2012  тэмцээний урдчилсан шатны тоглолтонд Австрийн шигшээг 6:2 харьцаатай хожсон бөгөөд өчигдөр Евро 2012 тэмцээнийг  зохион байгуулагч улсын нэг Польшийн шигшээтэй нөхөрсөг тоглолт хийж 2:2 –оор тэнцэв. Хоёр хөрш улсын  тоглолт үргэлжийн  өрсөлдөөнтэй болдог ба мөн энэ удаад ч  ширүүхэн өрнөсөн юм.

Данциг хотын шинэхэн цэнгэлдэх хүрээлэнд Германчууд үндсэн  хаалгач Мануэл Нойер болон Бастиан Швайнштайгер мөн Мезут Өзил, довтлогч Марио Гомес нарын шилдэг тоглогчдоо гэртээ үлдээгээд ирсэн байлаа. Гэхдээ Польш гаралтай хоёр довтлогч Лукас Подольский , Мирослав Клозе нар Польшийн эсрэг гараанд гарсан юм.  Дасгалжуулагч Иоахим Лөвь 7 тоглогчийн байрлалыг өөрчилж шинэ тактикийн туршилтаа хийжээ.

Тоглолтонд хоёр тал аль аль нь гоолын боломжуудыг гаргасан ч  эхний үе  0:0 харьцаатай өндөрлөсөн юм.  Хамгийн эхний аюултай довтолгоог Клозе   Польшийн хаалганд хийж  Арсеналийн хаалгач Во́йцех Ще́нсный аюулгүй болгож чадсан юм. Ще́нсный  үүний дараагаар  Марио Гөтце болон Клозе, Подольский нарын цохилтуудыг хааж багаа аюулаас аварав. Польшийн шигшээ багт Бундеслигт тоглодог тоглогчид байсны дотор Дортмундын Роберт Левандовский,  Блашчековский нар багтсан байлаа. Хурдтай довтолгоогоор үе үе Германы хамгаалагчдыг сандаргаж байсан Польшууд тоглолтын салхийг хагалсан юм. Роберт Левандовский  (55) Германы хаалганд эхний гоолыг оруулж Данцигийн цэнгэлдэхэд цугласан 40 000 үзэгчдийг баярлуулав. Гоол алдсан Германчууд алдаагаа нөхөх арга хэмжээг авч эхлэв. Үүний үр дүнд  Подольскийгийн оронд сэлгээгээр орж ирсэн Томас Мюллерийг Польшийн багийн хамгаалагч Гловаски 16 дотор унагааж 11 метрийн торгуулийн цохилт болов. Цохилтыг Тони Кроос (68) амжилттай хийж шигшээдээ анхны гоолоо орууллаа. Үлдсэн хугацаанд талбайн эздийн зүгээс дорвитой довтолгоо явагдсангүй. Харин 11 метрийн торгуулийн цохилтын буруутан Гловаски (81) нь хоёрдахь шар хуудсаа хүртсэнээр талбайг орхиж Польшууд хүн дутуу үлдлээ. Гэвч сонирхолтой үйл явдлууд үүгээр дуусаагүй байв. Тоглолтын нэмэлт цагт хаалгач Тим Вийзе  16 шугам дотор довтолж явсан тоглогчыг  унагааж 11 метрийн торгууль боллоо . Цохилтыг Дортмундын Блашчековский буюу Куба (90+1) амжилттай оруулж Польшууд дахин тоглолтыг хошуучилж эхэлсэн юм. Цаг дуусах дөхсөн байлаа гэвч баруун жигүүрээс Томас Мюллерийн оновчтой дамжуулалт Какаугын(90+4)  хөлд таарч тооны харьцааг тэнцүүлж чадав.  Энэ гоол нь Данцигийн цэнгэлдэхэд хожилын баяраа тэмдэглэж байсан хөгжөөн дэмжигчдийн уухайг дарж орхив. Ийнхүү талбайн эзэн Польшууд 17 тоглолтоос Германы шигшээг анхны удаа хожих боломжоо дахин алдав.