Бундеслигийн 5-р тойргын тоглолтонд Борусси  Дортмунд  Херта БСЦ багт 1:2 харьцаатай хожигдлоо. Дортмунд 19 тоглолтын турш өөрийн талбай дээрээ хожигдоогүй дээд амжилтыг Херта Берлин таслан зогсоолоо.

Дасгалжуулагч Юрген Клопын баг тоглолтын турш илүүрхсэн боловч алдарт тоглогч Маркус Бабелийн дасгалжуулсан нийслэл хотын багийн өмнө сөхөрлөө. Дортмундын гол тоглогчдын нэг Марио Гөтце хоёр тоглолтонд оролцох эрхээ хасуулсан нь энэ тоглолтонд тодорхой хэмжээгээр нөлөөлсөн нь ойлгомжтой.

Тоглолтын нэгдүгээр үеийн өрнөл Хертагийн талбайн хэсэгт явагдсан бөгөөд хааяа нэг сөрөг довтлох зочдын дайралт Дортмундын хаалганд төдийлөн аюул тарьсангүй.  Дортмундчууд Хертагийн нягт шигүү  хамгаалалтыг нэвтлэх нүх олохгүй байсаар нэгдүгээр үеийг өндөрлүүлсэн юм. Клоп хоёрдугаар үед Илкай Гюндоганы оронд ахмад тоглогч  Антонио да Силваг оруулж тоглолтонд шинэ салхи оруулах алхамыг хийв. Гэвч байдал өөрчлөгдсөнгүй. Харин эсрэгээрээ Хертагийн Рафаэль (50)  сөрөг довтолгоогоор Вайденфеллерийн хаалганд гоолдож Херта тоглолтыг хошуучилж эхлэв. Харин Дортмунд довтолсоор.. Томас Крафтын хаалганд ирсэн аюултай цохилт тухай бүртээ найдвартай хаалтанд орж байлаа.  Тухайлбал Свен Бендерийн алсын цохилт, Маттс Хуммелсийн мөргөлт зэрэг довтолгоонуудыг хааж багаа аварч байв. Юрген Клоп бүх болох арга хэмжээг авч байлаа.  Тэрээр шинэ довтлогч Иван Пересичийг сэлгээгээр оруулав. Мөн урт хугацааны турш гэмтэлтэй байсан өөрийн хайртай тоглогчдын нэг Мохамед Зинданыг оруулж ирэв. Гэтэл Хертагийн анхны булангын цохилтоор Нимаер (81) дахин гоолдож тоо 0:2 боллоо. Цаг өнгөрөх тусам  Дортмунд хүнд байдалд орж, Херта улам өөртөө итгэлтэй тоглолтыг үзүүлж байлаа.. Сэтгэл гонсойсон үзэгчид тоглолт дуусахаас өмнө Сигнал Идуна цэнгэлдэхийг орхиод эхэлсэн байлаа. Цаг дуусахаас өмнөхөн Да Силвагийн дамжуулалтыг Левандовскийн мөргөж оруулсанаар тооны харьцаа 1:2 болов. Гэхдээ Дортмундад тун бага хугацаа үлджээ. Дортмунд бүх хүчээрээ дайрч байсан ч Херта энэ үр дүнг хамгаалж үлдэхийн төлөө бүх хүчээ шавхаж байлаа. Нэмэлт 4 минутын хугацаанд олон дайралтуудыг хийсэн боловч Дортмунд тоог тэнцүүлж чадсангүй. Ингээд хамгийн сүүлд Леверкузенд хожигдсоноос хойш  улирлын турш өөрийн талбай дээрээ хожигдоогүй байсан хар шарууд улирлын хоёрдахь ялагдлаа хүлээллээ.