Наймдугаар сарын 26-наас есдүгээр сарын 21-нд хойд хөршийн Ханты-Мансийск хотноо болсон FIDE-гийн Дэлхийн цомын тэмцээн Оросын их мастер Петр Свидлерийн ялалтаар өндөрлөлөө. Дийлэнх нь их мастер цолтой шилдэг 64 шатарчин хасагдах журмаар өрсөлдсөн тус тэмцээний шувтаргад Свидлер нутаг нэгт Александр Грищукийг 2,5:1,5-аар буулган авсан юм.

Санкт-Петербургийн харьяат тэрбээр хоёр сар гаруйн өмнө ОХУ-ын АШТ-д зургаа дахь удаагаа түрүүлээд байжээ. Харин хүрэл медалийн төлөө цагтаа дэлхийн аварга цолын төлөө тулалдаж байсан Украины хоёр гроссмейстер В.Иванчук, Р.Пономарев нар өрсөлдөж, Василий нь 2,5:1,5-аар илүүрхжээ. “FIDE World Cup”-ын медальт гурван шатарчин ирэх жил болох дэлхийн аваргатай халз тоглох өрсөлдөгчийг шалгаруулах тэмцээнд оролцох эрхээ авчээ.