МХБХ, 24 дүгээр сургуулийн хөлбөмбөгийн секц, “ДМЮ” клубтэй хамтран Чингэлтэй дүүргийн II, III хорооны 11 хүртэлх насны өсвөрийн хөлбөмбөгчдийн дунд Street Football /гудамжны/ хөлбөмбөгийн тэмцээнийг зохион байгууллаа. Тэмцээн Чингэлтэй дүүргийн хоёрдугаар хороонд байрлах, тус клубийнхны өөрсдийн байгуулсан street football-ийн “Лежендс” талбайд болов.

Энэ удаагийн тэмцээнд нийт 10 багийн /нэг баг 4-6 хүний бүрэлдэхүүнтэй/ 50 гаруй тамирчин хурд хүч авхаалж самбаагаа сорин өрсөлдсөнөөс “Best Friends” түрүүлж, “Start” удаалж, “Red Bull”, “Smart” хагас шигшээд шалгарсан. Багууд эхний шатанд тав таваараа хоёр хэсэгт хуваагдан тоглож, хэсэг бүрээс хоёр баг цааш өрсөлдөх эрхээ авсан юм. Улмаар хагас шигшээд А1-В2, В1-А2 оноолтоор таарч, ялагчид нь аваргын төлөө өрсөлдсөн. Тэмцээний шилдэг тоглогчоор А.Баттулга /Red Bull/, шилдэг хамгаалагчаар С.Жамбалбавуу /Start/, шилдэг довтлогчоор Б.Батбаяр /Smart/ нар шалгарав.