Германы гар бууны төрөлд сүүлийн жилүүдэд хамгийн амжилттай яваа  мэргэн бууч Д. Мөнхбаяр  нь  жад шидэлтийн дэлхийн аварга Штеффи Нериус мөн туялзуур сэлэмний дэлхийн аварга Брита Хайдельман нарын хамтаар  Көльн хот дахь Германы Спорт- Олимпийн музейд тухлан ярилцжээ.

RTL- телевизийн хөтлөгч Улрике фон де Гроэбен эдгээр гурван эмэгтэй тамирчинтай  спортоо орхисон болоод одоо ч  идвэхтэй байгаа  тамирчидын талаар,  тус музейн байнгын үзмэрүүдийн тухай санал солилцжээ. Д. Мөнхбаяр өөрийн хувийн цуглуулагаас үүний дотор Бээжин 2008 наадмын  тэмцээний өмсгөл, дуу намсгагч чихэвч  болон өөрийн 2010 оны Мюнхений дэлхийн аваргад  амжилттай оролцох үедээ өмсөж байсан хувийн дугаартай өмсгөлийг музейд хүлээлгэн өгсөн байна. Музейн захирал Франк Дюьр ( баруун гар талаас )болон үзмэрийн албаны  дарга Вольфганг Левитцкий (зүүн гар талаас ) нар үзмэрүүдийг тун талархалтай хүлээн авчээ.

Германы гар бууны төрлийн хамгийн шилдэг эмэгтэй мэргэн бууч Д.Мөнхбаяр  саяхан  Герман болон Австри улсуудын  урлаг соёл, улс төр, нийгэм , эдийн засаг  болон спортод өндөр амжилт гарагасан  топ эмэгтэйчүүдийн талаар нийтэлдэг  “Who-is-Who” номонд өөрийн намтар нь  бичигдсэнд туйлын таатай  байгаа юм. Энэ ном нь 2010 оны намар худалдаанд гарсан бөгөөд номонд нийтлэгдсэн  намтар түүхүүд  олны сонирхолыг   үргэлж татсаар байгаа билээ.

Германы Буудлагын Холбооны  сайт  2011 оны 9 дүгээр сарын 20

Хэдийгээр  Д.Мөнхбаяр  Германы иргэн болсон ч энэ  нийтлэлийг уншаад  монгол хүмүүн бид түүнээр бахархахаас аргагүй.    Анх Бээжингийн олимпийн үер  Германы ZDF телевизээр   түүний шууд ярилцлагыг  үзэж суухдаа алс газар суугаа бидэнд  урд хожид байгаагүй  омогшил төрж билээ.  Олон сая хүн амтай  тэр дундаа Германы спортын нэг төрөлд хамгийн шилдэг нь хэмээн үнэлэгдэх нь хосгүй амжилт юм. Түүнчлэн “Who-is-Who”  номонд өөрийн нэрээ мөнхөлнө гэдэг ховор завшаан билээ. Гавьяат тамирчин Д. Мөнхбаяр эгчдээ spotnews.mn онлайн сэтгүүлийн хамт олноос цаашдын спортын замналдаа улам өндөр амжилт гаргахыг хүсэн ерөөж байна !