Рома “Олимпико” цэнгэлдэхдээ улирлын хоёр дахь хожлоо 3 : 1-ээр Аталантагаар авлаа. Нийслэл хотын багаас шинэ цэрэг Бояан Кркси анхны гоолоо хийсэн бол Пабло Освальдо, Фабио Симплисио нар тус бүр нэгийг нэмэрлэжээ.

Харин улирлын хожигдолгүй үргэлжлүүлж байсан Аталантагаас Герман Денис нэр төрийн ганц бөмбөгийг оруулсан.

Мартен Стеленбург бэртлээсээ эргэж ирсэн ч Луйс Энрике хаширлан Богдан Лобонцыг гараанд багтаасан байлаа.

Өнгөрсөн тойрогт Пармагаар улирлын анхны хожлоо авсан Рома тоглолтыг эрчтэй эхлүүлсэн. Луйс Энрикетэй хэл амаа ололцсон багийн ахлагч Тотти эхний аюултай цохилтыг хийлээ. Түүний цохилтыг Андреа Консильи аюулгүй болгосон.

Гэхдээ удалгүй нээлтийн гоол орлоо. Де Россигийн өлгөж өгсөн дамжуулалтыг Боян Кркич тогтоон авч хаалгачын алсын буланг чиглүүлэн гоол хийлээ.

Үүнээс 10 минутын дараа Пабло Освальдо Алеандро Росигийн мөргөн өгсөн дамжуулалтыг хүлээн авч хаалгачыг аргалан гоол хийлээ.

Аталантагийн лидерийн байрыг маш хурдан  олж авсан Герман Денис 48 дахь минутад тооны харьцааг ойртуулсан ч Фабио Симплисио 81 дэх минутад эцсийн цэгийг тавьжээ.

Улирлыг хасах зургаан оноотой эхлүүлсэн ч одоо 4 оноотой болчихоод байгаа Аталанта анхны ялагдлаа амслаа. Харин Рома 8 оноотой 3-р байранд.

 

 

 

Бояан Кркичийн дебут гоол Ромагийн хожлыг чимлээ, 9.2 out of 10 based on 10 ratings