Францын Парис хотноо энэ сарын 5-13-нд хүндийг өргөлтийн насанд хүрэгчдийн ДАШТ “хөшгөө нээж”, 76 орны 800 гаруй туйванч хүчээ сорьж эхэллээ. Тус тэмцээнд манайхаас хоёр бүсгүй оролцох бөгөөд “С” хэсэгт багтсан ОУХМ Г.Отгонтуяа 58 кг-д өнөөдөр, “Б” бүсэд орсон Н.Баярмаа 63 кг-д маргааш тус тус “шалгалт” өгнө.

2010, 2011 оны ДАШТ-ий багийн дүнг харгалзан “Лондон-2012″-ын эрх олгох аж. Дашрамд дурдахад Парис хотноо Баян- Өлгийн уугуул, Казахстаны суугуул дасгалжуулагч Т.Мендихаан баг тамирчдынхаа хамт очиж, арванхоёрдугаар сард Белгород хотноо болох ОХУын Ерөнхийлөгчийн нэрэмжит тэмцээнээ сурталчилж явна.