Парис хотноо ид үргэлжилж байгаа хүндийг өргөлтийн ДАШТ-д 93 улсын 550 туйванч эрэгтэйчүүдийн найм, эмэгтэйчүүдийн долоон жинд хүч сорьж байгаа билээ. Манай бүсгүйчүүд энэ удаа гавьтай амжилт гаргаж чадсангүй. Эмэгтэйчүүдийн 58 кг-д Г.Отгонтуяа 31 тамирчнаас сүүл мушгив. Жин их хассан тэрбээр огцомд гурав дахь оролдлогоороо 83 кг-ыг өргөсөн ч түлхэлтэд захиалсан 102 кг-ыг өргөж чадалгүй тэмцээний талбарыг орхив. ОУХМ Н.Баярмаа ч бас түүний жишээг давтсан нь харамсалтай. Түлхэлтээр 125 кг-ыг өргөсөн амжилт нь эхний 10-т бичигдэхүйц үзүүлэлт хэдий ч огцомд даалгавраа биелүүлж чадсангүй. Парисын дэвжээнд өрнөж байгаа дэлхийн туйванчдын бусад сониноос дуулгая.

Өнгөрсөн жилийн ДАШТ-д 48 кг-д өнгөлсөн Туркийн Нуркан Таяланыг түрүүлэх магадлалтай тамирчны тоонд хамгийн түрүүнд нэрлэгдэж байсан ч өвдөгний бэртэл сэдэрсний улмаас зорилгодоо хүрч амжсангүй. Эмэгтэйчүүдийн 53 кг-д 18 настай казахстан охин Зульфия Чиншанло 130 кг-ыг түлхсэн амжилтаар 2007 онд БНХАУ-ын Ли Пиний тогтоосон дэлхийн дээд амжилт (129)-ыг шинэчилсэн байна. Тэгвэл 58 кг-д аравдугаар байр эзэлсэн 17-той Тайваний тамирчин Куо Хсин Чүн “Парис-2011”-т өрсөлдөгчдийн хамгийн залуу туйванчаар тодорлоо. Тэрбээр 212 (94+118) кг-ыг шахсан нь чамлахааргүй үзүүлэлт юм.

63 кг-д ОХУ-ын Светлана Царукаева түлхэлттэйгээр 138 кг-ыг өргөж, дэлхийн дээд амжилтыг шинэчилжээ. 48 кг-д түрүүлсэн БНХАУ-ын туйванч Тянь Юань Сингапурын залуучуудын олимпийн аварга бөгөөд дэлхийн рекордыг ахиулах боломж хангалттай байсныг дасгалжуулагч нь өгүүлжээ. Олон улсын хүндийг өргөлтийн холбооны шийдвэрээр ДАШТ-д Болгар, Саудын Араб, Оман, Шри Ланкийн тамирчдыг албан ёсоор оролцуулаагүй бөгөөд залуучуудын ДАШТ-ийг 2013 онд Польш, 2014 онд Казахстанд зохиохоор тогтлоо.

ТЭМЦЭЭНИЙ ДҮН

Эмэгтэй,

48 кг: 1.Тянь Юань (БНХАУ) 207 (90+117) 2.Панида Хамсри (Тайланд) 187 (80+107) 3.Нурдан Карагоз (Турк) 183 (80+103)

53 кг: 1.Зульфия Чиншало (Казахстан) 227 (97+130) 2.Аялин Дасделен (Турк) 219 (93+126) 3.Жин Жи (БНХАУ) 214 (93+121)

58 кг: 1.Настасия Новыкава (Беларусь) 237 (101+136) 2.Ли Шюин (БНХАУ) 236 (103+133) 3.Пимсири Сирикаев (Тайланд) 230 (99+131)

63 кг: 1.Светлана Царукаева (ОХУ) 255 (117+138) 2.Майя Манеза (Казахстан) 248 (109+139) 3.Оуян Шяофан (БНХАУ) 246 (113+133)

Эрэгтэй,

56 кг: 1.Вү Жинбао (БНХАУ) 292 (133+159) 2.Жао Чаожүнь (БНХАУ) 284 (128+156) 3.Валентин Христов (Азербайжан) 276 (122+154)

62 кг: 1.Жан Жие (БНХАУ) 321 (145+176) 2.Ким Ан Гүк (БНАСАУ) 320 (150+170) 3.Эко Ираван (Индонез) 310 (139+171)

69 кг: 1.Тан Дэшан (БНХАУ) 341 (155+186) 2.Олег Чень (ОХУ) 336 (156+180) 3.Вү Чао (БНХАУ) 335 (150+185)

Б.ӨЛЗИЙТОГТОХ

18-тай казах охин дэлхийн дээд амжилтыг шинэчлэв, 8.3 out of 10 based on 3 ratings