Мэргэжлийн сүмогийн Кюүшюү башё замынхаа хагасыг ардаа орхилоо. Бөхчүүд нийт найман өдөр барилдсанаас их аварга Хакүхо, шинэ озэки Котошёогикү нар өвдөг шороодолгүй тэргүүлж явна. Харин тэргүүлэгчдийн эгнээнд явсан озэки Харүмафүжи дунд хэсэгт олон ялагдсанаар өдгөө даваа, унааных нь харьцаа 4-4 болоод байна. Мөн ганц унаатайгаар тэргүүлэгчдийг нэхэж байсан сэкивакэ Какүрюү өчигдөр Котошёогикүд шороодсоноор хоёр дахь ялагдлаа амсав.

Одоогоор сэкивакэ Кисеносато, маэгашира Вакакоюү, Такэказе гэсэн гурван бөх 7-1 амжилтаар аварга, арслан хоёрыг нэхэж байна. Тэгвэл маэгаширагийн гуравт эрэмбэлэгдсэн Аран найм дараалан унаснаар ирэх сард чансаа уруудах нь тодорхой боллоо. Жюүрёод барилдаж буй Монголын ганц бөх Кёкүшюүхо Т.Эрдэнэбаатар 7-1 амжилтаар тэргүүлэгчдийн дэд байрт бичигдэж буй. Зүүний зургаад бичигдсэн манай бөх энэ эрчээрээ барилдаад байвал ирэх башёд макүүчид дэвших боломжтой юм.