Арваннэгдүгээр сарын дундуур АНУ-ын Айдахо-Фоллс хотноо болсон “SRSA Classic Sumo” сүмо бөхийн олон улсын тэмцээнд манай тамирчин У.Бямбажав +115 кг, Т.Энхтуяа -115 кг-ын жинд тус тус аваргалжээ. Түүнчлэн манай хоёр бөх ес дэх удаагаа зохиогдсон тус тэмцээний үнэмлэхүй жинд зодоглон Бямбажав алт, Энхтуяа мөнгөн медаль хүртжээ. Мэргэжлийн сүмод Дайшёочи нэрээр барилдаж явсан Уламбаярын Бямбажав сонирхогчдын сүмо бөхөөр дэлхийн хошой аварга болсныг манай спорт сонирхогчид сайн мэдэх биз ээ.

Өдгөө Америкт ажиллаж, амьдарч буй тэрбээр Арнольд Шварценеггерийн зохион байгуулсан сүмогийн тэмцээнд гурван удаа түрүүлж, нэрт жүжигчний хүлээн авалтад уригдаж, Калифорни мужийн Карсон хотын хүндэт иргэн, Лос-Анжелес хотын “Найрамдал” медалийн эзэн болж, Холливудын алдарт “Тэнгисийн 13” кинонд тоглосон билээ. Харин чөлөөт бөхийн ДАШТ-ий IV байрын шагналт, улсын начин Төвшинтөрийн Энхтуяагийн хувьд саяхнаас сонирхогчийн сүмогоор хичээллэж эхэлжээ.

М.ОРГИЛ