Мэргэжлийн боксын дэлхийн аварга, гавьяат тамирчин Чойжилжавын Цэвээнпүрэвийг боксын ертөнцөд “Mongolian Warrior” нэрээр нь андахгүй. Англид арав гаруй жил нударга зөрүүлсэн тэрбээр мэргэжлийн рингэнд нийт 35 тулаан хийж, 30 ялсан. Үүнээс 23-ыг нь хүнд цохилтоор дуусгасан амжилттай. Түүний дүү Ч.Бумчин УАШТ-ээс хэд хэдэн медаль авсан, олимп, дэлхийн аварга Э.Бадар-Ууган, П.Сэрдамба нартай нэг үеийн тамирчин бөгөөд одоо хувиараа бизнес хийж буй.

Өдгөө Ч.Цэвээнпүрэв Лондонд эхнэр, хоёр хүүхдийн хамт амьдардаг бөгөөд охин нь наймдугаар ангид, хүү нь цэцэрлэгт явдаг аж. Аав, ээж, эгчийгээ гурван талдаа зогсоочихоод дунд нь Брюс Ли шиг эргэж өшиглөдөг бага хүүгээ “Монголын дайчин” аавынхаа шийрийг хатаах хүү байгаа юм даа гэж өхөөрддөг гэнэ. Ингээд “Choi Tseveenpurev” хуудсан дахь зургийн цомгийн дээжээс толилуулъя.