Дубайн хөлбөмбөгийн “Аль Васл” клубийн ерөнхий дасгалжуулагч Диего Марадона ээлжит дуулианаа дэгдээлээ. АНЭУ-ын “Аль Айна” клубтэй хийсэн тоглолтын үеэр хэл ам таталсных нь төлөө түүнд 2,7 мянган долларын торгууль оногдуулсан байна. “Бурхны гар”-ын шавь нар “Аль Айна”-д 0:2-оор хожигдсоны дараа уг маргаан дэгдсэн аж. Улмаар хоёр дасгалжуулагч нь бие бие өөдөө муу үг шидэлцэж, барилцаж авахад хүрсэн гэнэ. Тус улсын хөлбөмбөгийн холбооноос румын дасгалжуулагч Космин Оларойд арга хэмжээ авсан боловч буруугаа хүлээгээгүй тэрбээр нүдээ олсон шийдвэр гаргахгүй бол ажлаа хүлээлгэж өгөхөөс буцахгүй гэдгээ ч өгүүлэв.

Ямар ч тэмцээний үеэр маргаан тэмцэл өрнөх нь бий. Гэхдээ дасгалжуулагчид биесээ занан зүхэж, нударга зөрүүлэх нь зохисгүй үйлдэл. Уг тоглолтын дараа аргентин эр “Өрсөлдөгч багийн дасгалжуулагч нь манай шилдэг тоглогч Мариано Дондаг гэмтээх даалгавар өгсөн. Тэд зорилгодоо хүрсэн. Би хөлбөмбөгч байхдаа, дасгалжуулагч болоод ч ийм гажиг, амиа бодсон мэх хэрэглэж байгаагүй” хэмээн өгүүлжээ. Үүний хариуд румын дасгалжуулагч “Марадонагийн тархи урьд нь хэрэглэж байсан хар тамхиндаа хордсон хэвээр байна” гэж хэлсэн аж.

Нэрт хөлбөмбөгчинд Арабын ертөнц зохихгүй байгаа шинжтэй. Учир нь тэрбээр “Аль Шабаб” багтай хийсэн тоглолтын үеэр шүүгчидтэй маргалдан, бухимдлаа газар дээр нь илэрхийлсэн юм. Түүний удирддаг клуб долоон тоглолтын дараах байдлаар 11 оноо цуглуулж жагсаалтын зургадугаарт бичигдэж буй. Энд “илгээлтээр” ирэхээсээ өмнө алдарт хөлбөмбөгч “Марадонагийн хэв маягийг тэнд мэдрүүлнэ” гэж ам гарсан удаатай. Б.ӨГДЭЙ