Арсеналын домогт довтлогч Тьерри Анри төрөлхи багтаа эргэн ирэх гэж байна. Тэрээр хоёр сарын зээлээр Лондонд эргэн ирэх гэж байгаа тухай Английн хэвлэлүүд бичиж байна.

Өдгөө 34 настай Анри 11 сард MLS-ийн улирал өндөрлөснөөс хойш Арсеналтай хамт бэлтгэл хийж байгаа юм. Он гараад Шамах, Жервиньо нар Африкийн цомд оролцох учраас туршлагатай довтлогчоо эргүүлэн авчирахаар Венгер төлөвлөж байна.

Хэрвээ Анри Арсеналтай гэрээ байгуулах юм бол 3 сар дуустал премьер лигийн 7 тоглолт болон ФА цом, лигийн цом, Аваргуудын лигийн хасагдах шатны эхний тоглолтуудад оролцох боломжтой юм.

ЛА Галакси багийн довтлогч Лэндон Донован мөн иймэрхүү гэрээгээр премьер лигийн Эвертон багтай гэрээ байгуулсан юм.

Пер Мертесакер Анриг ирэх гэж байгаад сэтгэл хангалуун байна.

“Анригийн туршлага манай багт их хэрэг болно. Гэхдээ би удирдах албаны хүн биш болохоор нарийн ширийн зүйлсийг сайн мэдэхгүй. Бэлтгэл дээр л гэхэд Анри өөрийгөө ямар тоглогч гэдгийг хангалттай харуулдаг. Өмнө нь тоглож байсан шигээ тэр гайхалтай хэвээрээ байгаа”