Нэрийн хуудас:

Бадрахын Одончимэг. 1981 онд Төв аймгийн Баянцогт суманд төрсөн.
Чөлөөт бөхийн ОУХМ, самбо, жүдо бөхийн спортын мастер цолтой.
Амжилт:
Чөлөөт бөхөөр МБАТС-иас хошой алт (2004, 2008), насанд хүрэгчдийн УАШТ-ээс таван алт (2001, 2003, 2006, 2007, 2009), нэг мөнгөн (2002) медаль хүртсэн. Мөн насанд хүрэгчдийн ДАШТ-ий хүрэл (2009), оюутны ДАШТ-ий мөнгө (2006), Азийн наадмын хүрэл (2006), Азийн АШТ-ий мөнгө, хүрэл, ОУТ-ий хоёр алт, мөнгө, хүрэл медальтай.
Самбоор УАШТ-ээс нэг алт, гурван мөнгө, нэг хүрэл, жүдогоор алт, мөнгө, хүрэл медаль нэжгээдийг хүртсэн.
Тэрчлэн кураш бөхөөр УАШТ-ий хоёр алт, нэг мөнгө, сүмогоор гурван алт, нэг мөнгө медаль хүртсэн.

-Юуны өмнө ДАШТ-ээс медаль хүртсэнд баяр хүргэе. Спорт сонирхогчид өөрийн чинь медалийн төлөөх барилдааныг л зурагтаар үзсэн. Данийн дэвжээнд хэн хэнтэй хэрхэн хүч үзсэнээ дэлгэрэнгүй өгүүлэхгүй юу?
-Баярлалаа. Миний хувьд эхний барилдаанаа Канадын бөх дэлхйин аварга Мартине Дугреньетэй хийж, хоёр үед 0:2, 1:2-оор хожигдсон. Ерөнхийдөө өөртөө жаахан итгэлгүй барилдсанаас ялагдсан даа. Гарч ирээд Ц.Цогтбаяр багшдаа загнуулсан. “Чи үргэлж өөртөө итгэлгүй байх юм. Түүнээсээ болж хожигддог. Амьдрал дээр ч юманд иймэрхүү байдлаар ханддаг” гээд л зэмлүүлсэн. Загнуулсан маань дараа дараагийн барилдаануудад нөлөөлсөн. “Нээрээ би үүнээс болж хожигдоод байна. Одоо цаашаа үзэх боломж гарвал медаль заавал авна даа” гэж бодож байлаа. Гэхдээ Дугреньег финалд шалгарна, тэгээд дагаж барилдана гэдэгт итгэлтэй байсан. Яагаад гэвэл тэрбээр сүүлийн дөрвөн жил дараалан шувтаргад шалгарч, нэг алт, гурван мөнгө хүртэж байсан сайн бөх учраас.
Хоёрдугаар тойрогтоо Азербайжаны бөх, Европын АШТ-ий мөнгөн медальт З.Гурбанхажиеватай учраа таарлаа. Түүнийг өмнө нь 72 кг-д барилддаг байсныг, олимпоос хойш дандаа 67 кг-д хүч сорих болсныг нь мэднэ. Өмнө нь О.Бурмаатай барилдаж байхыг нь харсан юм. Бурмаагаас онцлогийг нь асуух гэтэл манай хүн барилдахаар гараад явчихсан. Эхний үед 1:0-ээр хожиж яваад дэвжээний зах руу шахаад байхаар нь дэгээ ороож шидэх гээд өөр дээрээ алдаж, улмаар сармай татуулж 1:6-гаар хожигдох нь тэр. Биеэ барьсны улмаас барилдаан гаргаж чадаагүй тал бий. Энэ үед гавьяат тамирчин Б.Наранбаатарын “Чи биеэ их чангалах юм. Аль болохоор суллаж, тайван өр” хэмээн хэлж байсан үг санагдаад хоёрдугаар үеэс огт өөрөөр барилдсан. Барилдааны явцад “Орж ирэхэд дагуулж мушгивал болох юм байна” гэсэн бодол төрсөн. Тэр мэхээрээ хоёрдугаар үеийн дундуур оноо аваад сүүлийн дөчөөд секунд хамгаалж байгаад цаг дуусгасан. Гуравдугаар үед мөн л орж ирэхэд нь толгойг нь уургалаад тавхайлдан цэвэр дарсан.
Гурав дахь өрсөлдөгч маань 2002 оны дэлхийн аварга, Европын гурван удаагийн аварга Украины Катерина Бурмистрова байлаа. Хамгийн анх Красноярскийн олон улсын тэмцээнд оролцож байхдаа Бурмистроваг анзаарсан. Тэгэхэд Бурмистрова, 48 кг-ийн япон хоёр бүх өрсөлдөгчөө илт давуу хожин тасархай түрүүлж байсан юм. Түүнээс хойш түүнийг тэмцээн болгон дээр ажиглана, нөгөөх маань ч оролцсон тэмцээн бүрээсээ меадаль зүүнэ. Яагаад ч юм бүү украинаас огт эмээж бэргээгүй, нэг л тайван байсан. Дэвжээн дээр гараад бариад авсан чинь гайгүй санагдсан. Намайг шилдээд дайрахаар нь худлаа хойшоо ухарч байгаад сууж үүрээд гурван оноо авав. Цаг руу хартал дөнгөж 30-хан секунд өнгөрч байна. Өмнө нь олимпод Хятадын тамирчинд яг иймэрхүү байдлаар эхэлж гурван оноо авчихаад хэрхэн хамгаалахаа мэдэхгүй сандарсаар байгаад хожигдсон гашуун түүх бий. Тэрийгээ санан санан хий гаргалгүй байсаар цагаа дуусгасан. Дараа нь дэвжээний голд хөлөө алдаж 0:1-ээр дийлдсэн. Шийдвэрлэх гуравдугаар үед шодоо миний талаар бууж хожсон.
Хүрэл медалийн төлөө Азийн аварга Ёшико Иноүэг 3:1, 1:0-ээр ялсан. Ноднингийн ДАШТ-ий дараах хамтарсан бэлтгэл дээр Иноүэтэй барилддаг байлаа. Бэлтгэл дээр оноо алдчихаад байдаг байсан. Гэхдээ тэр үед бие маань жаахан тааруу байсан юм. “Тийм үедээ ойролцоо байсан юм чинь одоо бол хожчихно доо” ухааны юм бодож байлаа. Эхний үед хөмөрч бөөн оноо авсан бол хоёрдугаар үед хэн хэн нь оноо авалцалгүй шодолцох болов. Японууд сайн хамгаалдаг учраас хөлийг нь авчихаад дутуу юм хийн хожигдож байснаас хөлөө өгөх нь дээр санагдаж байлаа. Яагаад гэвэл би ч гэсэн хөлөө алдчихаад тийм ч амар оноо алддаггүй. Миний санаснаар болж 1:0-ээр хожсон.
-Хүрлийн төлөөх тэр барилдаанаа сүүлд зурагтаар харсан уу?
-Амжаагүй л явна.

-Бокс, жүдогийнхон ДАШТ-ээс медаль, аваргатай ирсэн. Тэр ч утгаараа чөлөөтийнхөн Данийг зорихдоо нэлээд дарамттай явсан байх. Ялангуяа сүүлийн өдөр О.Бурмаа та хоёр Монголын багийн медальтай ирэх эсэхийг шийдвэрлэх хүнд барилдааныг хийсэн…
-Манайхан “Заавал медаль авах ёстой шүү” гэж үүрэг даалгавар өгч, хуралдаж бариад байсан юм байхгүй. Тийм болохоор биеэ барих нь харьцангуй гайгүй байсан. Ер нь тэгээд заавал тэгнэ ингэнэ гээд байхаар алдаа гаргаж, хүссэн барилдаанаа гаргаж чаддаггүй муу талтай. Нэг зүйл хэлэхэд сая боксын ДАШТ-ээс мөнгөн медаль хүртсэн 17 настай Н.Төгсцогт гэдэг хүүхэд чинь манай “Алдар”-ынх юм шүү дээ. Дотроо “17-той хүүхэд дэлхйин шилдгүүдийг ялж болоод байхад би өчнөөн олон жил барилдчихаад яагаад медаль авч чаддаггүй юм бэ” гэж бодож байсан.
-Уучлаарай, нэг бус сонин хэвлэл дээр Б.Одончимэгт гавьяат цолыг нь олгосонгүй гэх зэргээр бичсэнийг уншсан байлгүй. Ялгавартай хандсанд гомдолтой байна уу?
-Би болохоор энэ яриаг ерөөсөө тоогоогүй. Заавал гавьяат болох ёстой гэсэн бодол ерөөсөө төрөөгүй. “Нас маань залуу байна. Дахиад ДАШТ-ээс медаль авч л таараа. Тэгээд нэр хүндтэйгээр тэр цол хэргэмийг нь авна даа” гэж л бодсон.
-Гэхдээ хоёр өрөө байраар шагнасан гэл үү?
-Тийм. Батлан хамгаалах яамны сайд байр олгох батламж бичгээ гардуулсан. Тэр байр нь манай “Алдар”-тай ойрхон, оны өмнө ашиглалтад орох юм гэнэ лээ. Надад одоохондоо тэр одон медаль, гавьяа шагналаас илүү байр нь хэрэгтэй байгаа учраас үнэхээр их баярласан шүү.
-Хичнээн жил “Алдар”-ын нэрийн өмнөөс тэмцээн уралдаанд оролцож байна вэ?
-2003 оноос Ц.Хосбаяр, Ц.Цогтбаяр багштай хамтран ажиллаж байна. Би чинь Зэвсэгт хүчний 311-р ангид харъяалалтай, ахлах дэслэгч цолтой. Мөн хажуугаар нь шигшээ багт данстай. Манай “Алдар”-ынхны онцлог гэвэл бусад клубийнхнийг бодвол хэвтээ барилаанд сайн. Яагаад гэвэл Цогоо багш маань өөрөө тамирчин байхдаа партераас сайн барилддаг байсан.
-БТДС-д хөнгөн атлетикийн дасгалжуулагч мэргэжлээр суралцаж байсныг чинь мэдэх юм. Хэзээнээс бөх барилдсан хэрэг вэ?
-Энэ тухай яривал урт түүх болно. Би 10 жилд байхдаа Эрдэнэтийн “Хангарьд” клубийн хөнгөний секцэнд явдаг байлаа. Тэр үед манай эрэгтэй дүү, дээд, урд хашааны маань хүүхдүүд бөхийн дугуйланд явцгаах. Нэг удаа тэд нарыг дагаж клуб дээр нь очтол Монгол Улсын гавьяат тамирчин Х.Батхишиг эгч бэлтгэл хийгээд байж байсан. Бэлтгэлийг хангалцан хэсэг ноцолдсоны дараа тэрбээр “Чи ер нь барилдвал яасан юм. Сайн бөх болвол гадагшаа тэмцээн уралдаанд явах боломж их байдаг юм” гэсэн. Түүнээс арваад хоногийн дараа өсвөрийн УАШТ-д оролцож медаль авчихлаа. Эхлээд ялагдчихаад учраа мэдэхгүй дагаж барилдсаар хүрэл дээр буусан. Намар нь БТДС-д хөнгөн атлетикийн багш дасгалжуулагч мэргэжлээр суралцахаар ирсэн. Хотод ирээд Х.Батхишиг эгчтэй тааралдлаа. Намайг “Женко” клубт ОУХМ Ш.Цэвэлмаа багш дээр аваачсан юм. Ингээд үндсэндээ 1999 оноос барилдаж эхэлсэн дээ. Самбо, жүдогийн үндсэн бэлтгэл хийдэг ч төрөл бүрийн бөхөөр тэмцээн уралдаанд оролцоно.
Бөхөд хөл тавьсан маань Батхишиг эгчийн гавьяа гэж боддог. Сүүлд Хишгээ эгч Солонгост байхдаа намайг хоёр танилтайгаа утсаар танилцуулж, нөгөө хоёр ах сар бүр надад мөнгө явуулдаг байсан. Намайг огт танихгүй, хараа ч үгүй байж сэтгэлээсээ тусална гээч. Тэд харь оронд компанийн захирал хийдэггүй байсан нь тодорхой. Хөлсөө дуслуулж олсон хэдээсээ харамгүй илүүчилдэг байсан тэр хүмүүстэй уулзаж, ачийг нь хариулах юмсан.
-Хэзээнээс чөлөөтөөр дагнав?
-Дөрвөн жилийн өмнөөс. Цогоо багш сайн ятгасан л даа. Багш нар надад “Чи ийм өсгөлүүн бие хаатай юм чинь амжилт гаргах магадлалтай” гээд л онгирооно. Тэгээд бодоод байсан чинь чөлөөт бөх нь надад илүү тохирох юм шиг санагдсан.
-Самбо, жүдогийн бэлтгэл чинь чөлөөт барилдахад хэрэг болдог уу?
-Бололгүй яахав,  адаглаад л ачих, тонгорох зэрэг мэхнүүдийг гайгүй хийчихнэ. Самбо, жүдо барилдахад ч гэсэн чөлөөт бөхийн бэлтгэл маань хэрэг болно гэж боддог юм.
-Дархан мэх чинь юу вэ?
-Дархансаад байх юу байх вэ. Мундаг хүмүүс л дархан мэхтэй байдаг байх. Би ихэвчлэн зоон дээр мэх хийдэг. Ухарч байгаад хүчийг нь дагуулдаг гэх үү дээ.  Одоо хоёр гарынхаа хүчийг нэмэгдүүлэх тал дээр анхаарна.
-Чиний хувьд Азийн бөхчүүд эвгүй юу, эсвэл европ зүгийнхэн нь илүү хүчтэй юу?
-Япон, Хятадын бөхчүүдтэй барилдах эвгүй байдаг. Хурд техниктэй, тойрсон барилдаантай.
-Жин хэр хасдаг вэ?
-Миний биеийн жин 68 кг орчим болохоор бараг хасдаггүй.
-Шүтэж биширдэг бөх?
-2002 онд Иранд болсон ДАШТ-д О.Пүрэвбаатар ах нутгийн бөх М.Талайг дэвжээн дээр нь ялж медаль авч байсан бичлэгийг үзээд Ооска ахаар бахархах сэтгэл төрж билээ.
-Сургуульд сурч байгаа гэл үү?
-Өнгөрсөн хавар би Батлан хамгаалахын их сургуулийн менежмент, төрийн захиргааны ангийг төгссөн. Энэ жил магистрантурт сурч байгаа.
-Гэр бүлийн байдал?
-Ээж, дүү нартайгаа амьдардаг. Найз залуутай болж амжаагүй байгаа.
-Тэмцээн уралдаанд оролцох зардлаа хэрхэн гаргадаг вэ?
-Одоо шигшээ багт байгаа болохоор зардлын асуудал дээр санаа зоволтгүй болсон. Өмнө нь Цогоо багш маань “Чи санаа зоволтгүй, багш нь яаж ийгээд зохицуулна” гэдэг байлаа. Сая Дани явахад багшийн маань зардал олддоггүй. Г.Мандахнаран бид хоёр багшийгаа авч явахын тулд зээл тавьсан. Ер нь бид нар “Тэмцээнд ороод медаль авна. Шагналынхаа мөнгөөр өрөө дарна” гээд зээл тавиад л явдаг.
Энэ дашрамд намайг болон баг хамт олныг маань үргэлж тусалж дэмжиж байдаг МҮОХ, БТСГ, МЧБХ, БХИС, “Алдар” спорт хороо, Зэвсэгт хүчний 311-р анги, Үндэсний шигшээ багийн дасгалжуулагчид, эмч, илээч нар, багш Ц.Хосбаяр, Ц.Цогтбаяр нартаа баярлаж талархаж явдгаа танай сониноор дамжуулъя.

Хуваалцах/Тэмдэглэх

Б.Одончимэг Канадын бөх Мартин Дугриниертэй хийж 0-2, 1-2-оор ялагдлаа. Дугриниер ДАШТ-ий нэг алт, гурван мөнгөн медальтай тамирчин юм.

Ингээд сүүлчийн найдвар нь О.Бурмаа боллоо.  “Хүч” спорт хорооны тамирчин эхний тойрогтоо хийлж хоёр дахь тойрогт Шведийн бөх Женни Френссонг 2-0, 1-0 ээр ялж, удаахь тойрогт Испаний бөх Майдер Ундаг 2-0, 1-0 ээр яллаа. ОУХМ О.Бурмаа хэсгийн аваргын төлөө Австрийн бөх Марина Гастлтай хүч үзлээ. Марина Гастлыг манай бөх мөн л хоёр үед буулган авч аваргын төлөө шалгаран үлджээ. Түүнтэй Хятадын бөх Сяочин Чин аваргын төлөө барилдах юм.

Эхний үед Хятадын бөх манай О.Бурмаагийн хөлд тойрч суугаад ард нь гарч 1 оноо авснаар эхний үеийг тэргүүлэв. Хоёрдугаар үе дундаа орж байхад Сяочин Чин давхар хамж дэвжээнээс гаргаснаар 1 оноо авч мөн 1-0ээр ялан аваргын төлөө барилдааны ялагч боллоо. Ийнхүү Сяочин Чин дэлхийн аварга болж Монголын Очирбатын Бурмаа мөнгөн медаль хүртлээ.

67 кг-ийн жинд манай тамирчин Б.Одончимэгийг ялсан Канадын бөх Мартин Дугриниер шигшээ барилдаанд шалгарчээ. Дэлхийн аварга, дэлхийн аваргын гурван мөнгөн медальтай Канад бүсгүй тав дахь удаагаа финалд шалгарч буй нь энэ. Канадын бөх шигшээд шалгарснаар манай Одноо цаашид дагах барилдаан хийх эрхтэй боллоо.

Б.Одончимэг торгуулийн тойргийн эхний барилдаанаа Азербайжаны Зумруд Гүрбанхажиеватай хийлээ. Эхний үед манай бөх 1-6-аар ялагдсан ч хоёр, гуравдугаар үед 1-0, 2-0 ээр ялснаар дараагийн шатанд Украйны бөхтэй барилдахаар боллоо. Украйны Катерина Бурмистроваг эхний үед 3-1 ээр ялсан ч хоёрдугаар үед 0-1ээр ялагдав. Шийдвэрлэх 3-р үед 1-0-ээр ялснаар манай бөх Б.Одончимэг Японы Ёшико Иноуэтэй хүрэл медалийн төлөө барилдахаар боллоо.

Бадрахын Одончимэг дэлхийн аварга Ёшико Иноуэг 3-1, 1-0-ээр хоёр үед ялж ДАШТ-ий хүрэл медаль хүртлээ.

Манай тамирчид 67 кг-ийн жинд уламжлалтай гэж хэлж болохоор. 2005, 2006 оны ДАШТ-д Г.Наранчимэг шагналт байранд орж байсан бол өнгөрсөн жилийн ДАШТ-д О.Насанбурмаа хүрэл медаль хүртэж байлаа. Энэ жингийн алтан медалийг эхний даваанд манай Одноог ялсан Канадын Мартин Дугриниер гардлаа. Ийнхүү тэр дэлхийн аваргын 2 алт, 3 мөнгөн медальтай болж буй юм.

Монголчуудын хувьд тэмцээний сүүлчийн өдөр хос медаль авлаа. Энэ нь манай эмэгтэй бөхийн түүхэнд 4 дэх медаль болж байгаа юм. 2007 оны ДАШТ-ий 59-кг-ийн жинд Доржийн Нармандах хүрэл, 2008 онд 67 кг-ийн жинд Очирбатын Насанбурмаа хүрэл медаль хүртэж байжээ.

ДАШТ-ийн чөлөөт бөхийн дүн.

Эрэгтэй

Жин	Алт	Мөнгө	Хүрэл
55 кг	Кён Ил Ян (БНАСАУ)	Сезар Акгуль (Турк)	Ризван Гажиев (Беларус)
			Виктор Лебедев (ОХУ)
60 кг	Бесик Кудухов (ОХУ)	Залимхан Хусейнов (Азарбайжан)	Дилшод Мансуров (Узбекистан)
			Васил Федоришин (Украйн)
66 кг	Мехди Тагхави (Иран)	Расул Жукаев (ОХУ)	Тацухиро Ёнэмицу (Япон)
			Леонид Спиридонов (Казахстан)
74 кг	Денис Царгуш (ОХУ)	Чамсулвара Чамсулвариев (Азарбайжан)	Рамеш Кумар (Энэтхэг)
			Садег Гударзи (Иран)
84 кг	Заурбек Сохиев (Узбекистан)	Жэкоб Херберт (АНУ)	Ибрагим Алдатов (Украйн)
			Шариф Шарифов (Азарбайжан)
96 кг	Хаджимурат Гацалов (ОХУ)	Хетаг Газюмов (Азербайжан)	Серхат Балчи (Турк)
			Георгий Гогшелизе (Гүрж)
120 кг	Бильял Махов (ОХУ)	Масуми Фардин (Иран)	Йоаннис Арзуманидис (Грек)
			Тервел Длагнев (АНУ)

Эмэгтэй

Жин	Алт	Мөнгө	Хүрэл
48 кг	Мария Стадник (Азарбайжан)	Лариса Ооржак (ОХУ)	Со Сим-Хян (БНАСАУ)
			Людмила Балюшка (Украйн)
51 кг	Софиа Маттсон (Швед)	Хан Кум Ок (БНАСАУ)	Олександра Кохут (Украйн)
			Юри Кай (Япон)
55 кг	Саори Ёшида (Япон)	Сона Ахмедли (Азарбайжан)	Алена Филипава (Беларус)
			Тоня Вербеек (Канад)
59 кг	Юлия Раткевич (Азарбайжан)	Агата Пьетршик (Польш)	Марияна Састин (Унгар)
			Ганна Васыленко (Украйн)
63 кг	Мио Нишимаки (Япон)	Любовь Волосова (ОХУ)	Елена Шалыгина (Казахстан)
			Жюстин Бушар (Канад)
67 кг	Мартин Дугриниер (Канад)	Юлия Бартновская (ОХУ)	Ифеома Ихеаначо (Нигери)
			БАДРАХЫН ОДОНЧИМЭГ (МОНГОЛ)
72 кг	Чин Сяочин (Хятад)	ОЧИРБАТЫН БУРМАА (МОНГОЛ)	Майдер Унда (Испани)
			Станка Златева (Болгар)

Хуваалцах/Тэмдэглэх

Энэ өдөр эмэгтэйчүүдийн 55 кг, 59 кг, 63 кг-ын жингийн барилдаанууд болж, жин тус бүрийн аваргууд тодорсон билээ. Энэ жинд манай гурван тамирчин өрсөлдсөн боловч харамсалтай нь ялагдсан юм.

55 кг /эмэгтэй/: ДАШТ-ий чөлөөт бөхийн эмэгтэйчүүдийн барилдааны 55 кг-ын жинд жинд өрсөлдсөн Ю.Гандолгор эхний тойрогтоо Африк тивийн хошой алт, мөнгөн медальт Нигерин бөх Ловина Эдвардтай барилдаж оноогоор хожигдож, техникийн оноо авсанаар ялж дараагийн тойргийн барилдаанд Азийн аваргын мөнгөн медальт, Казахстаны бөх Айяим Абдилдинад ялагдсанаар тэмцээнийг орхиж есдүгээрт байранд бичигджээ.

ДАШТ-ий 55 кг-ын жингийн медальтнууд:

Алт – Саори Ёшида /Япон/

Мөнгө – Сона Ахмедли /Азербайжан/

Хүрэл – Алена Филипава /Беларусь/

Хүрэл – Тоня Вербеек /Канад/

59 кг /эмэгтэй/: ДАШТ-ий чөлөөт бөхийн эмэгтэйчүүдийн 59 кг-ын жинд жинд өрсөлдсөн С.Батцэцэг эхний тойрогтоо дэлхийн аваргын хүрэл медальт, Европ тивийн алт, хүрэл медальт,  Украйны бөх Ганна Васыленкод ялагдсанаар энэ удаагийн ДАШТ-ийг орхисон юм. Энэ жинд Азербайжаны бөх Юлия Раткевич аваргын алтан медаль хүртсэн бол Польшийн бөх Агата Пьетршик мөнгөн медаль хүртжээ. Түүнчлэн Унгарын тамирчин Мариянна Састин, Украйны тамирчин Ганна Васыленко нар хүрэл медалийн эздээр тодорсон байна.

ДАШТ-ий эмэгтэйчүүдийн 59 кг-ын жингийн медальтнууд:

Алт – Юлия Раткевич /Азербайжан/

Мөнгө – Агата Пьетршик /Польш/

Хүрэл – Мариянна Састин /Унгар/

Хүрэл – Ганна Васыленко /Украйн/

63 кг /эмэгтэй/: ДАШТ-ий чөлөөт бөхийн эмэгтэйчүүдийн 63 кг-ын жинд жинд зодоглосон манай тамирчин Ш.Түмэнцэцэг эхний тойрогт Испанийн бөх Тереза Мендезтай барилдаж, ялагдсанаар тэмцээнээ дуусгасан.

ДАШТ-ий эмэгтэйчүүдийн 63 кг-ын жингийн медальтнууд:

Алт – Миё Нишимаки /Япон/

Мөнгө – Любовь Волосова /ОХУ/

Хүрэл – Елена Шалыгина /Казахстан/

Хүрэл – Жюстин Бухар /Канад/

Өнөөдөр манай үлдсэн бөх Б.Одончимэг /эм-67 кг/, О.Бурмаа /эм-72 кг/ нар өрсөлдөнө.

67 кг-Спортын мастер Б.Одончимэг (“Алдар” спорт хороо) Канадын бөхтэй барилдана. Манай хүний өрсөлдөгч ДАШТ 3 удаагийн мөнгөн медальт, Монголд болсон оюутны дэлхийн аврага шалгаруулах тэмцээнээс хүрэл медаль авч байсан хүчтэй тамирчин юм.

63 кг-Спортын мастер О.Бурмаа (“Замчин” спорт хороо) Шведийн бөхтэй хүч үзнэ.

Өнөөдөр барилдах хоёр бүсгүйдээ амжилт хүсье!

Хуваалцах/Тэмдэглэх

Өчигдөр манай гурван бөх зодоглолоо. Үүнээс манай эрчүүдийн сүүлчийн төлөөлөгч болох улсын аварга Д.Гомбодорж барилдсан. Манай тамирчин эхний даваанд хийлж хоёрдугаар тойрогт Молдавын бөх Александ Буркатай барилдлаа. Уг барилдааны эхний үед 2-6, хоёрдугаар үед 2-3-аар ялагдсанаар тэмцээнээ өндөрлөсөн юм. Энэ жингийн алтан медалийг ОХУ-ын залуу бөх Денис Царгуш хүртлээ.

Байр	Нэр	Улс
1	Денис Царгуш	ОХУ
2	Чамсулвара Чамсулвариев	Азербайжан
3	Рамеш Кумар	Энэтхэг
3	Садег Гударзи	Иран
19	Доржваанчиг Гомбодорж	Монгол

Эмэгтэйчүүдийн барилдаан өчигдрөөс эхэллээ. 48 кг-ийн жинд Азийн аварга Э.Нарангэрэл эх орноо төлөөлөн барилдлаа. Э.Нарангэрэл эхний тойрогтоо хийлж хоёрдугаар тойрогтоо Казахстаны бөх Шулдыз Ешимоватай учраа таарсан. Манай тамирчин эхний үедээ 0-1ээр ялагдаж, хоёрдугаар үедээ 1-1 ээр тэнцэн сүүлийн оноог алдсан тул ялагдал хүлээлээ. Цаашид Казахстаны бөх нь ялагдсан тул манай хүний тэмцээн дуусчээ. Энэ жингийн алтан медалийг Бээжингийн олимпийн хүрэл медальт, Украйн гаралт Азербайжан бөх болох Мария Стадник хүртжээ.

Байр	Нэр	Улс
1	Мария Стадник	Азербайжан
2	Лариса Ооржак	ОХУ
3	Со Сим-Хян	БНАСАУ
3	Людмила Балюшка	Украйн
17	Эрдэнэсүхийн Нарангэрэл	Монгол

51 кг-ийн жинд ОУХМ Д.Отгонцэцэг барилдав. Д.Отгонцэцэг эхний даваанд Швейцарийн бөхийг 5-1, 4-2-оор ялж гараагаа сайхан эхлүүллээ. Гэвч хоёрдугаар шатанд Молдавын Наталья Будуд 1-4, 0-4 өөр ялагдсанаар тэмцээнээ дуусгалаа.

Байр	Нэр	Улс
1	Софиа Маттсон	Швед
2	Хан Кум Ок	БНАСАУ
3	Олександра Кохут	Украйн
3	Юри Кай	Япон
14	Даваасүхийн Отгонцэцэг	Монгол

ДАШТ-ийн гурван өдрийн дараах байдлаар багийн дүнгээр ОХУ дөрвөн алт, хоёр мөнгө, нэг хүрэл медальтай тэргүүлж байна.

Байр	Улс	Алт	Мөнгө	хүрэл	нийт
1	ОХУ	4	2	1	7
2	Азербайжан	1	3	1	5
3	Иран	1	1	1	3
	Умард Солонгос	1	1	1	3
5	Узбекистан	1		1	2
6	Швед	1			1
7	Турк		1	1	2
	АНУ		1	1	2
9	Украйн			4	4
10	Япон			2	2
11	Беларус			1	1
	Казахстан			1	1
	Гүрж			1	1
	Грек			1	1
	Энэтхэг			1	1

Өнөөдөр эмэгтэйчүүдийг 55 кг-ийн жинд ОУХМ Юрагийн Гандолгор (“Аварга” БТДС) эхний тойрогтоо Нигерийн бөхтэй барилдана. Ялах аваас Киргиз, Казахын ялсантай нь хүч үзнэ.

59 кг-Спортын мастер Соронзонболдын Батцэцэг (“Замчин” спорт хороо) Украйны бөхтэй барилдах аж. Манай хүний өрсөлдөгч Европын аварга, ДАШТ-ийн хүрэл медальтай гэнэ.

63 кг-Спортын мастер Шархүүгийн Түмэнцэцэг (“Замчин” спорт хороо) Испаний Тереза Мендезтэй хүч үзнэ.

Өнөөдөр барилдах гурван бүсгүйдээ амжилт хүсье!

Хуваалцах/Тэмдэглэх

МУГТ Б.Наранбаатарын БНАСАУ-ын бөх Кён-Ил Янтай хийсэн барилдаан.

МУГТ Б.Наранбаатарын Их Британий бөх Красимир Крастановтой хийсэн барилдаан.

ОУХМ П.Өнөрбатын Австрийн бөхтэй хийсэн барилдаан.

ОУХМ П.Өнөрбатын БНАСАУ-ын бөхтэй хийсэн барилдаан.

ОУХМ П.Өнөрбатын Туркын бөхтэй хийсэн барилдаан.

Хуваалцах/Тэмдэглэх

Хамгийн түрүүлж 120 кг-тйн ОУХМ Ж.Чулуунбат дэвжээнээ гарлаа. Түүний өрсөлдөгч Болгарын Димитар Ангелов Кумчев байсан. Эхний үед манай бөх 1-0-ээр ялагдсан бол хоёрдугаар үед хоёр бөх 3-3 оноогоор тэнцжээ. Болгарын бөх сүүлчийн оноог авсан тул дүрмийн дагуу ялалтыг авсан байна. Энэхүү Болгар дараагийн шатанд Польшийн бөхөд ялагдсанаар манай Ж.Чулуунбатын тэмцээн дуусчээ.

120 кг-ийн жинд алтан медалийг Бильял Махов хүртлээ. Дэлхийгээс дөрөв дэх алтан медалиа хүртсэн нь энэ. Мөнгөн медалийн Азийн дөрвөн удаагийн аварга, ДАШТ-ийн мөнгө, хүрэл медальт Ираны Масуми Фардин хүртсэн бол хүрэл медалийг Грек, АНУ-ын бөхчүүд хүртжээ.

84 кг-ийн жинд Азийн аварга Ч.Ганзориг эхний тойрогт хийлж хоёрдугаар тойрогт Канадын бөх Трэвиз Кросстой барилдав. Манай бөх эхний үед 1-1-ээр тэнцэн сүүлийн оноог алдсанаар ялагдсан бол хоёрдугаар үед 4-0-ээр ялагджээ. Нөгөө Канад нь дараагийн шатанд Венесуэльд ялагдсан тул манай тамирчны ДАШТ дуусчээ.

Манай гол найдваруудын нэг гэж үзэж байсан 60 кг-ийн Г.Мандахнаран эхний учраа болох Беларусын Махамедау Махамедкамилд хоёр үе барилдан ялагджээ. Эхний үед 1-2, дараах үед 0-1-ээр ялагдлаа. Өнөөх Беларус хэсгийн барилдаанд аварга болох хувьтай Бесик Кудуховт ялагдаж манай бөх цаашид өрсөлдөх эрхгүй болжээ. Жин өгсөж барилдсан Кудухов дэлхийн хошой аварга боллоо.

Өнөөдөр эрэгтэйчүүдийн сүүлчийн төлөөлөгч болох 74 кг-ийн Д.Гомбодорж барилдана. Эхний тойрогтоо хийлсэн ба хоёрдугаар тойрогтоо Молдав, Венесуэлийн бөхчүүдийн ялсантай нь хүч үзэхээр болжээ.

Мөн эмэгтэйчүүдийн барилдаа эхэлж байна. 48 кг-ийн жинд манай тамирчин Азийн аварга Э.Нарангэрэл эхний тойрогтоо хийлж, хоёрдугаар тойрогтоо Казахстаны бөх Шулдыз Ешимоватай учраа таарчээ.

Эмэгтэйчүүдийн 51 кг-ийн жинд ОУХМ Д.Отгонцэцэг барилдана. Эхний тойрогтоо Швейцарийн бөх Надин Токартай хүч үзэх аж. Түүний өрсөлдөгч нь ДАШТ-ээс хүрэл медаль хүртэж байжээ.

Өнөөдөр манай бөхчүүд Улаанбаатарын цагаар 19.30-аас барилдацгаана.

Өнөөдөр барилдах гурван бөхдөө амжилт хүсье!

Хуваалцах/Тэмдэглэх

ОУХМ, Азийн аварга Ч.Ганзориг Канадын бөх Трэвиз Кросст ялагдлаа.

Манай бөх эхний үед 1-1-ээр тэнцэн сүүлийн оноог алдсан тул, хоёрдугаар үед 4-0-ээр тус тус ялагджээ.

ОУХМ Г.Мандахнаран өрсөлдөгч Беларусын бөхөд ялагджээ. Эхний үед 1-2-оор, хоёрдугаар үед 0-1-ээр ялагдаж Беларусын бөхөө финалд үлдээсэй хэмээн харах үлдлээ.

Хуваалцах/Тэмдэглэх

Эхний өдөр манайхаас гурван бөх зодоглохоор сугалаанд оролцсон байсан ч 96 кг-ийн жингийн Я.Алтантулга эх орноосоо тодорхой шалтгааны улмаас мордоогүй юм. Эхний өдрийн хоёр бөх Б.Наранбаатар, П.Өнөрбат нартай хамт түрүүлээд ниссэн Г.Мандахнаран өнөөдөр дэвжээнд гарах юм.

Дашрамд хэлэхэд манай эхний гурван бөхийг явахад Женко компаний Х.Баттуул болон түүнтэй хамт 9 сарын 20-нд Берлин нисэх байсан хоёр хүн гүн туслалцаа үзүүлж онгоцныхоо билетийг өгчээ. Манай гурав Берлин хүртэл нисээд Данийн Хернинг рүү машинаар давхин амжиж хүрсэн байна. Очиход эмнэлгийн үзлэг, жингийн үзлэг дууссан байсан ч тэнд ФИЛА-ийн конгресст оролцож холбооны ерөнхийлөгч Л.Чинбат, ерөнхий нарийн бичгийн дарга Г.Бат-Эрдэнэ нар ФИЛА-тай ярьж байгааддахин эмнэлгийн комиссыг бүрдүүлэн үзлэгт нь оруулжээ. Манай хоёр удирдлага мөн баг тамирчид очоогүй байхад тамирчдаа сугалаанд оруулсан байсан юм.

Манай баг тамирчдын үлдсэн хэсэг өчигдөр мөн онгоц Эрхүүд саатсаны улмаас хоцрон очжээ. Энэ үед мөн л холбооны хоёр удирдлага гуйж байж эмнэлгийн комиссыг дахин ажиллуулсан байна. Ийнхүү ямар ч байсан манай тамирчид тэмцээндээ оролцохоор боллоо.

Өчигдөр манай хоёр бөх зодоглолоо. Гол найдваруудын нэг МУГТ Б.Наранбаатар дэвжээнд түрүүлж гарсан ба БНАСАУ-ын бөхтэй хүч үзсэн юм. Эхний үед 5-1ээр итгэл төгс ялсан ч дараагийн үеүдэд 1-3, 0-4-өөр ялагдсан юм. БНАСАУ-ын бөх Кён Ил Ян дараа дараагийн учраануудаа ялсаар шигшээд үлдсэн нь Б.Наранбаатарт торгуулийн тойргийн барилдааныг хийх эрх олгосон юм. Манай бөх торгуулийн тойргийн барилдаанаа Их Британий Красимир Крастановтой хийж эхний үед 2-1 ээр ялсан ч 1-4, 0-1 ээр хоёр, гуравдугаар үед ялагдсанаар энэ удаагийн ДАШТ-ээ дуусгалаа. Б.Наранбаатар 17-р байр эзэлжээ.

55 кг-ийн жингийн аваргаар БНАСАУ-ын Кён Ил Ян, дэд аваргаар Туркийн бөх Сезар Акгуль, хүрэл медальтнаар БеларусийнРизван Газиев, ОХУ-ын Виктор Лебедевь нар тодорчээ.

66 кг-ийн жинд улсын аварга, Азийн АШТ-ийн мөнгөн медальт П.Өнөрбат барилдав. Өнөрөө эхний даваандаа хийлж хоёрын даваанд Австрийн бөхтэй барилдсан. Австрийн бөхийн 1-0, 4-0 ээр ялж БНАСАУ-ын бөхтэй барилдав. Энэ бөхтэй манай бөх 2008 оны Азийн аваргын шигшээ, Улаанбаатард болсон Ерөнхийлөгчийн цом тэмцээнд барилдаж ялагдаж байжээ. Энэ удаа дэлхийн дэвжээнд даагаа нэхэж 1-0, 1-1 ээр ялжээ. Хэсгийн аваргын төлөө Туркийн бөх Мухаммед Илхантай барилдаж эхний үед 1-0 ээр ялсан ч хоёр, гуравдугаар үед 0-2, 0-1-ээр ялагдсанаар Туркийн бөхийг ялаасай хэмээн хүлээх үлдсэн. Гэвч Туркийн бөх Ираны бөхөд ялагдсанаар манай бөх дагах эрхгүй болж тэмцээнээ өндөрлөлөө. Манай П.Өнөрбат жиндээ 10-р байрыг эзэлсэн байна.

Энэ жингийн алтан медалийг Ираны Мехди Тагхави, мөнгөн медалийг ОХУ-ын Расул Жукаев, хүрэл медалийг Японы Тацухиро Ёнэмицу, Казахстаны Леонид Спиридонов нар хүртжээ.

Энэ өдөр мөн 96 кг-ийн аварга тодорлоо. Энэ жинд босоо олимпийн аварга, дэлхийн гурван удаагийн аварга ОХУ-ын Хаджимурат Гацалов дөрөв дэхээ дэлхийд аваргаллаа. Олимпийн хүрэл медальт Азербайжаны Хетаг Газюмов мөнгөн медаль, олимпийн хүрэл медальт Гүржийн Георгий Гогшелизе, Туркийн Серхат Балчи нар хүрэл медаль хүртжээ.

Өнөөдөр манай бөх 60 кг-ийн ОУХМ Ганзоригийн Мандахнаран (“Алдар” спорт хороо), 84 кг-ийн ОУХМ Чагнаадоржийн Ганзориг (“Хүч” спорт хороо), 120 кг-ийн ОУХМ Жаргалсайханы Чулуунбат (“Арслан” клуб) нар барилдана.

Г.Мандахнарангийн эхний учраа нь Беларусын Махамедкамил Махамедау. Түүний хэсэгт Иран, ОХУ (Кудухов), Киргиз, Туркмений хүчтэй бөхчүүд байна.

Ч.Ганзориг эхний даваанд хийлж хоёрын даваанд Канадын бөх Трэвиз Кросстой барилдах сугалаа татжээ. Ялах аваас Венесуэл, Францын ялсантай нь хүч үзэх юм.

Ж.Чулуунбатын хувьд Болгарын Димитар Ангелов Кумчевтэй түрүүлж барилдах нь.

Хуваалцах/Тэмдэглэх

Эхний үед 1-0 ээр ялалт байгуулав. 2-р үед 1-1ээр тэнцсэн байна. Оноо тэнцсэн тохиолдолд сүүлийн оноог авсан бөх нь тухайн үеийн ялагч болдог дүрмийн дагуу П.Өнөрбат ялж шигшээ 8-д шалгарчээ.

Шигшээ 8-д үлдсэн Өнөрөө Туркийн бөх Мухаммед Илхантай хүч үзлээ.  Эхний үед 1-0ээр ялалт байгуулсан ч 2, 3-р үеүдэд 0-2, 0-1 ээр ялагдсанаар Туркийн бөх цааш өрсөлдөх эрхтэй болжээ.

Манай бөхийн ялсан Туркийн бөх Ираны бөхөд ялагдсанаар манай тамирчин П.Өнөрбат шагналт байртайгаар ДАШТ-ийг дуусгаж байна.

Гавьяат тамирчин Б.Наранбаатарыг ялсан Ардчилсан Солонгосын бөх дараа дараагийн учраагаа ялсаар шигшээ барилдаанд шалгарчээ. Ингэснээр гавьяат маань дагах барилдаан хийх эрхтэй боллоо. Б.Наранбаатар Их Британий бөх Красимир Крастановтой барилдана.

Торгуулийн барилдаанууд манай цагаар 23:30-аас эхэлнэ.

Хуваалцах/Тэмдэглэх

Манай гавьяат барилдааны эхний үед 5 оноо авч 1 оноо алдаж эхний ялалтыг авчээ. Гэвч хоёр, гуравдугаар үед 3-1, 4-0 ээр ялагдсанаар тэмцээнээ дуусгалаа.

66 кг-ийн жинд Азийн АШТ-ийн мөнгөн медальт П.Өнөрбат Австрийн бөхтэй хоёрын даваанд учраа таарсан. П.Өнөрбат эхний шатанд хийлсэн юм. Эхний үед 1-0, 2-р үед 3-0ээр ялснаар Монголчуудын энэ тэмцээний анхны ялалтыг авчээ. Түүний дараагийн учраа нь БНАСАУ-ын Чун Сон Ян юм байна.  Чон Сон Ян ӨАБНУ, Болгарын бөхчүүдийг ялж манай хүнтэй өрсөлдөхөөр болжээ.

П.Өнөрбат өнгөрсөн жилийн ААШТ-ийн шигшээ барилдаанд энэ солонгостой барилдаж ялагдаж байв.

96 кг-ийн жинд манай тамирчин Я.Алтантулга тэмцээнд оролцох байсан ч өчигдөр өглөө түүний оронд 60 кг-ийн Г.Мандахнаранг явуулжээ.

Хуваалцах/Тэмдэглэх