Бид албан ёсны эрхийг аван шууд дамжуулан үзүүлсэн ба Олон улсын жүдогийн холбооны сайтаар манай дүрс шууд явж байсныг хэлэхэд таатай байна.

Бид Монголдоо анх удаа бүрэн хэмжээний сурвалжлагыг үзүүлэхийг зорьсон бөгөөд шууд дамжуулан үзүүлэх, фото мэдээллийг газар дээр нь шуурхай толилуулах, ярилцлага, бусад мэдээллийг шууд дамжуулан үзүүлэхийг гол зорилгоо болгон ажиллалаа. Хэдийгээр зорилгодоо бүрэн хүрээгүй ч цааш цаашдаа илүү олон арга хэмжээг илүү сайнаар явуулах итгэлтэй боллоо.

Бидний энэхүү ажилд гүн туслалцаа үзүүлсэн Монголын Жүдо Бөхийн Холбоо, C1 телевиз, ТриМедиа ХХК ийн voodoo.mn social network site -ийн хамт олондоо баярласан талархсанаа илэрхийлье.

Хуваалцах/Тэмдэглэх

Зочдоо шинжихүй

Тэмцээний чанар чансааг оролцогчдын тооноос гадна тэдний зэрэг дэвээр тодорхойлж болох. Тиймээс “Чингис хаан” Дэлхийн цомд ирсэн багуудын бүрэлдэхүүнийг шинжье.
Хамгийн хүчтэй бүрэлдэхүүнтэй багт тооцогдож байсан Өмнөд Солонгосын жүдочид үүнийгээ батлан багийн дүнгээр тэргүүллээ. Дэлхийн аварга, олимп, дэлхийн медальтан, тивийн аваргуудыг багтаасан Солонгосын багт 12 жүдоч байснаас ес нь финалд шалгарч, хоёр нь л ялагджээ.
Европт олонтаа түрүүлсэн, ДАШТ-ий медалийн төлөө барилдаж үзсэн бөхчүүдтэй Украины баг БНСУ-Монголын дуэль дундаас хоёр алтан медаль сугалж чадсан. Гэхдээ Максим Коротун, Валентин Греков нарын шилдгүүд нь хоосон үлдсэн гэхээр тэдний амжилт бас л чамлалттай. 14 тамирчинтай украинчууд найман медаль авч, дөрвөн бөх нь медалийн төлөө барилдаанд дийлдсэн байна. Хэдий цөөн хүнтэй ч Польш, Чех, Узбекистан, Казахстаны бөхчүүд олонд танигдсан, өсөх ирээдүйтэй тамирчид байлаа. ОХУ-ын хувьд УАШТ нь өндөрлөөд удаагүй тул шигшигдсэн баг ирүүлэх боломж хомс байжээ. Үүнтэй ижил шалтгаанаар өмнөх хөршийнхөн (Спартакиад нь саяхан болсон) “Чингис хаан” Дэлхийн цомд төлөөллөө барилдуулсангүй.

М.Вахун: Санаснаас олон орон ирлээ

Дэлхийн цомын тэмцээн эхлэхийн өмнөх өдөр зохион байгуулагчид сэтгүүлчдэд хандан мэдээлэл хийлээ. IJF-ээс “Чингис хаан” Дэлхийн цомын тэмцээнийг зохион байгуулах ажлыг гардан хийлгэхээр ерөнхийлөгчийн зөвлөх, Чехийн иргэн Михал Вахуныг илгээжээ. Түүний хувьд өмнө нь Монголд нэг бус удаа ирж байсан нэгэн. Хэвлэлийн бага хурлын үеэр тэрбээр “Хавар Улаанбаатарт ирэх үедээ монголчууд яаж Дэлхийн цом зохионо доо гэж бодож байлаа. Харин одоо Спортын төв ордныг харахад танигдахааргүй өөр болжээ. Энэ өндөр зэрэглэлийн тэмцээнийг зохион явуулах гэж МЖБХ-ны хамт олон сэтгэл гарган зүтгэсэн нь анзаарагдаж байна” хэмээн өгүүлсэн. Түүнчлэн “Дэлхийн цомыг зохион байгуулах эрх авсан улсад эхний ээлжинд төдийлэн олон орон очдоггүй явдал ажиглагдаж байгаа. Жишээ нь энэ оны зургадугаар сард Бразилийн Белу-Оризонтед арав хүрэхгүй орны тамирчид очсон бол хоёр долоо хоногийн өмнө Азербайжаны Бакуд 14 орны 100 хүрэхгүй жүдоч цугласан. Харин Улаанбаатарт санаснаас олон орны баг иржээ” гэв.
Энэ жилийн Дэлхийн цомд Ази, Европын олон орон оролцохоор урьдчилсан мэдүүлэг өгөөд байсан боловч арваннэгдүгээр сарын 7-8-нд Бээжинд болохоор хуваарьт бичигдсэн гранпри тэмцээн цуцлагдсанаар нэг сумаар хоёр туулай буудах төлөвлөгөөтэй олон баг санаагаа өөрчилсөн юм.

100 хувь

Улаанбаатарт хөл тавьсан БНСУ-ын бүх жүдоч энгэртээ Их хааны дүр бүхий медалийг гялалзуулан нутаг буцах боллоо. 100 хувийн амжилт үзүүлсэн солонгосчууд багийн дүнгээр ийнхүү итгэл төгс тэргүүлсэн. Тэгвэл монголчуудын хувьд бас нэгэн үзүүлэлтээр төгс амжилт гаргалаа. Эрэгтэйчүүдийн 60 кг-д есөн бөх барилдахад манай дөрвөн бөх медалийн тавцанд зэрэгцэн зогслоо. Энэ жинд саяхан залуучуудын ДАШТ-ээс хоёр дахь мөнгөн медалиа хүртсэн Д.Төмөрхүлэг шүүгчийн алдаатай шийдвэрийн улмаас ялагдсан. Хэд хэдэн удаа юүко үнэлгээг нь хүчингүй болгосны дараа тэрбээр Украины Ласкутаг даацтай далаар нь тавьсан ч дэвжээний шүүгч дөнгөж вазари заасан. Эргэлзээтэй энэ олон үйлдлийн дараа манай залуу жүдоч шатсан уу, харцагадаж тэвэрч дайрах гээд сөрж мордуулан цэвэр ялагдлаа.

Иппон, иппон, иппон !

Барилдааны шинэчилсэн дүрмийн зарим заалтыг энэ тэмцээнд хэрэгжүүлснийг үзэгчид анзаарсан нь лавтай. Монголчуудын түгээмэл хийдэг суганд сэжээд хонгодож цацдаг мэх энэ удаа хориотой байв. Хэдий тийм ч тохох, давхар ачих зэрэг мэхээр цэвэр ялах тохиолдол маш олон гарсан. Эрэгтэйчүүдэд 99 барилдаан болоход 68 нь хугацаанаасаа өмнө дууссан бол эмэгтэйчүүд 64 барилдахад 53 хувь буюу 34 нь иппоноор дуусчээ.

Даагаа нэхэх төлөвлөгөө

Эмэгтэйчүүдийн 48 кг-д түрүүлсэн БНСУ-ын Чун Жун-Ён энэ жилийн ДАШТ-ээс хүрэл медаль хүртсэн шилдэг бөх. Тэрбээр “Чингис хаан” Дэлхийн цомын финалд Монголын жүдоч М.Уранцэцэгийг хантэйгаар ялсан юм. Ингэснээр тэд 2009 онд гурван удаа таарч барилдахад бүгдэд нь солонгос бүсгүй давамгайлсан үзүүлэлттэй болов. Чун Жун-Ён энэ жил Азийн аварга болохдоо хагас шигшээд, Голландад дэлхийн аваргын хүрэл зүүхдээ шөвгийн наймд үлдэх эрхийн төлөө барилдаанд тус тус манай бөхийг хожсон билээ. Үүнтэй адилаар эрэгтэйчүүдийн -100 кг-д Б.Тэмүүлэн Украины Артем Блошенкотой барилдах ёстой байв. Манай бөх энэ жил Хамбургийн Гранпри тэмцээний эхний тойрогт түүнтэй таарч ялагдсан бөгөөд ДАШТ-д наймд үлдээд мөн л түүнд дийлдсэн билээ. Тэдний хувьд энэ тэмцээний хэсгийн аваргын төлөө барилдаанд таарах магадлалтай байсан ч Б.Тэмүүлэн БНСУ-ын Акинори Хонгод цэвэр ялагдчихсан юм. Блошенко ч өнөөх япон бөхөд өнхрөн хүрэл медалиас өөр сонголтгүй болсон.

Дараагийн тэмцээний талаар

“Лондон-2012” олимпийн циклд дахин гурван удаа Дэлхийн цомын тэмцээнийг зохион байгуулах эрхтэй манай улс 2010 оны зургадугаар сарын 19-20-нд хоёр дахь тэмцээнийг хийх хуваарь гарчээ. Улаанбаатарын Дэлхийн цомын өмнөх долоо хоногт Португалд эрэгтэйчүүд, Эстонид эмэгтэйчүүд цувралын ээлжит тэмцээнд өрсөлдөх юм. Хэдий тулгуу хугацаанд хол газар тэмцээнтэй байгаа ч тавдугаар сараас нь олимпийн эрхийн оноо тооцоод эхлэх тул өрсөлдөөн энэ удаагийнхтай харьцуулахааргүй болох биз ээ.

Тэмцээний дүн
Эрэгтэй
60 кг (9 бөх): 1.Чимэд-Юндэнгийн Болдбаатар 2.Ганбатын Болдбаатар 3.Отгоны Чинбат, Даваадоржийн Төмөрхүлэг (бүгд Монгол) 5.Анатолий Ласкута (Украин), Павел Петриков (Чех)
66 кг (13): 1.Хашбаатарын Цагаанбаатар (Монгол) 2.Сергей Дребот (Украин) 3.Бүүвэйбаатарын Хишигбаяр (Монгол), Херворк Хеворкян (Украин) 5.Хавьер Дельгадо (Испани), Нилс Дочоу (Герман)
73 кг (11): 1.Бан Гүй-Ман (БНСУ) 2.Пиотр Куркьевич (Польш) 3.Одсүрэнгийн Болд-Эрдэнэ, Сайнжаргалын Ням-Очир 5.Далайгийн Энхболд, Ганболдын Пүрэвдорж (бүгд Монгол)
81 кг (11): 1.Сон Дэ-Нам (БНСУ) 2.Гантөмөрийн Дашдаваа (Монгол) 3.Ник Хайн (Герман), Артем Васыленко (Украин) 5.Хорхе Бенавенте (Испани), Лукаш Блач (Польш) 7.Рэгдэлийн Анхбаатар (Монгол)
90 кг (15): 1.Вадим Синьявски (Украин) 2.Тимур Болат (Казахстан) 3.Хуршид Набиев (Узбекистан), Квон Ён-Ү (БНСУ) 5.Качпер Ларем (Польш), Валентин Греков (Украин)
-100 кг (11): 1.Хван Хи-Тэ (БНСУ) 2.Акинори Хонго (Япон) 3.Артем Блошенко (Украин), Баттулгын Тэмүүлэн (Монгол) 5.Роман Полозин (ОХУ), Бенжамин Берла (Герман) 7.Батсуурийн Бат-Орших (Монгол)
+100 кг (8): 1.Станислав Бондаренко (Украин) 2.Ким Сү-Хван (БНСУ) 3.Болдпүрэвийн Сугаржаргал (Монгол), Казүхико Такахаши (Япон) 5.Адилжан Тулендибаев (Узбекистан), Доржпаламын Ганхуяг 7.Хадбаатарын Мөнхбаатар, Баярсайханы Төгөлдөр (бүгд Монгол)
Эмэгтэй
48 кг (7): 1.Чун Жун-Ён (БНСУ) 2.Мөнхбатын Уранцэцэг 3.Эрдэнэчимэгийн Номин, Баасанхүүгийн Уранчимэг 5.Батчулууны Саранзаяа (бүгд Монгол), Тетьяна Лусникова (Украин)
52 кг (9): 1.Мөнхбаатарын Бундмаа 2.Балжиннямын Бат-Эрдэнэ (хоёул Монгол) 3.Люси Хытра (Чех), Чой Кеум-Май (БНСУ) 5.Ольга Суха (Украин), Баатарсайханы Солонго (Монгол)
57 кг (7): 1.Цэнд-Аюушийн Цэрэннадмид 2.Доржсүрэнгийн Сумъяа 3.Түмэн-Одын Баттөгс (бүгд Монгол), Ким Жан-Ди (БНСУ) 5.Төмөр-Очирын Мөнгөнтуяа (Монгол), Ханна Бруэк (Герман)
63 кг (8): 1.Цэдэвсүрэнгийн Мөнхзаяа (Монгол) 2.Жоун Да-Үн (БНСУ) 3.Сэлэнгийн Энхзаяа (Монгол), Светлана Чепурина (Украин) 5.Мөнгөншагайгийн Нямжаргал (Монгол), Стефани Штейнмец (Герман) 7.Уранчимэгийн Отгонтуяа (Монгол)
70 кг (7): 1.Хван Е-Сул (БНСУ) 2.Наталья Смаль (Украин) 3.Пүрэвжаргалын Лхамдэгд, Отгоны Мөнхцэцэг 5.Энхбатын Аззаяа, Цэнд-Аюушийн Наранжаргал (бүгд Монгол)
-78 кг (6): 1.Жён Гён-Ми (БНСУ) 2.Анника Хайзе (Герман) 3.Ядмаагийн Дулмаа, Баттулгын Мөнхтуяа 5.Болдбаатарын Түмэнцэцэг, Төрбатын Баасанжав (бүгд Монгол)
+78 кг (6): 1.Ким На-Ён (БНСУ) 2.Доржготовын Цэрэнханд 3.Октябрийн Жаргалсайхан (хоёул Монгол), Кристина Крайе (Герман) 5.Гармаагийн Гантогос, Баясгалангийн Уянга (хоёул Монгол)
БАГИЙН ДҮН
А    М    Х    Нийт
1.БНСУ             7     2     3     12
2.Монгол          5     6    16    27
3.Украин          2     2    4      8
4.Герман          0     1     2     3
5.Япон              0     1    1      2
6.Польш           0     1    0     1
7.Казахстан     0     1    0     1
8.Чех                0     0    1     1
9.Узбекистан   0     0    1     1

Хуваалцах/Тэмдэглэх

Европын 6 улсаас 45 бөх, Азийн 7 орноос 83 бөх барилдахаар болжээ.

Мэдүүлгээ илгээсэн байсан БНХАУ, Ираны багууд хүрэлцэн ирсэнгүй.

Дэлхийн цомын тэмцээнийг http://sportnews.mn/chinggiskhancup/ хаягнаас шууд дамжуулан үзэх боломжтой.

Хуваалцах/Тэмдэглэх

-Монгол улсын ерөнхийлөгчийн Тамгын газрын дарга Д.Дорлигжав “Чингис хаан-2009” жүдо бөхийн дэлхийн цомын аварга шалгаруулах тэмцээн болох байр, талбайг хүлээж авна.

2009 оны аравдугаар сарын 30. Баасан

-Монгол Улсын Ерөнхийлөгч гадаадын төлөөлөгчдөд шагнал гардуулна. Гадаадын төлөөлөгч Монгол Улсын ерөнхийлөгчид шагнал гардуулна.

-19.00 цагаас шүүгчдийн семинар болно.

-21.00 цагаас сугалаа, багийн ахлагч нарын уулзалт болно.

2009 оны аравдугаар сарын 31. Бямба

06.30-07.30 цагт албан бус хяналтын жин үзэх.

07.30-08.00 цагт албан ёсны жин үзэх.  /эрэгтэй 60кг, 66 кг, 73/, /эмэгтэй 48, 52, 57, 63 /

10.00 цагт тэмцээн эхлэх

13.00-14-00 цагт тамирчид IVY IJF өдрийн зоогт орох.

15.00 цагт тэмцээний нээлтийн ёслолын арга хэмжээ болно.

16.00 цагт шигшээ барилдаан болно.

18.00 цагт шагнал гардуулах ёслолын ажиллагаа

20.00 цагт Монгол Улсын Ерөнхийлөгчийн хүндэтгэлийн хүлээн авалт. “Чингис хаан-2009” жүдо бөхийн “Дэлхийн цом”-ын аварга шалгаруулах тэмцээнд оролцох гадаад, дотоодын албаны төлөөлөгч, шүүгчид оролцоно. Хүлээн авалт “Их тэнгэр” цогцолборт болно.

2009 оны арваннэгдүгээр сарын 1. Ням

06.30-07.30 цагт албан бус хяналтын жин үзэлт.

07.30-08.00 цагт албан ёсны жин үзэх эрэгтэй /81, 90, -100, +100/, /эмэгтэй 70, -78, +78/

10.00 цагт тэмцээн эхэлнэ.

13.00-14-00 цагт тамирчид IVY IJF өдрийн зоогт орно.

16.00 цагт шигшээ барилдаан болно.

18.00 цагт шагнал гардуулах ёслолын ажиллагаа

19.00 цагт “Чингис хаан-2009” тэмцээний зохион байгуулах хорооны дарга Х.Баттулгын хүндэтгэлийн оройн зоог, “Дэлхийн цом”-ын тэмцээний хаалтын хүлээн авалт.

Дэлхийн цомын тэмцээнийг http://sportnews.mn/chinggiskhancup/ хаягнаас шууд дамжуулан үзэх боломжтой.

Хуваалцах/Тэмдэглэх