"Спортын цонх" онлайн сэтгүүл - Спортод хайртай хүн бүрт зориулав! » Мото Гран При

Азийн мотокроссын аварга шалгаруулах тэмцээн (зургийн цомог №1)

Ууган-Эрдэнэ Э — Mon, 20 Jul 2009 11:48:54 +0000

Азийн мотоциклийн холбоо, Монголын автомашин мотоциклийн спортын холбоо, Монгол Улсын Засгийн газар, Эрүүл мэндийн яам, БТСГ-ын дэмжлэгтэйгээр мотоциклийн бартаат замын Азийн АШТ-ний цуврал II шатны уралдааныг өнгөрөгч амралтын өдрүүдэд зохион байгууллаа. Нийслэлийн Хан-Уул дүүргийн нутаг дэвсгэр, олны нэрлэж заншсанаар Морингийн даваанд явагдсан тус тэмцээнийг “АПУ” ХК, “Капитал” групп, “Таван богд” моторс, “Наран трейд” компани ивээн тэтгэв.
Тэмцээнд БНХАУ-аас хоёр, ОХУ-аас дөрөв, БНСУ, Филиппин, Иранаас хоёр, Тайланд, Индонез, Японоос тус бүр нэг тамирчин, Монголын 14 төмөр хүлэгтэн авхаалж самбаа, эр зоригоо сорин өрсөлдсөн. Тэмцээний өмнөх өдөр буюу бямба гаригт тамирчид хоёр удаагийн нэгдсэн бэлтгэл хийж уралдаанд оролцлоо. Энэ удаагийн тэмцээний аваргуудыг “Наран трейд” компани “Tissot” фирмийн бугуйн цагаар урамшуулсан юм.

Азийн АШТ-ий салхийг 12-14 насны 85 см ангиллын өсвөр үеийн мотоциклчид хагаллаа. Тус тэмцээнд Филиппиний залуу тамирчин Жеррик Митра хоёр гараанд хол тасархай тэргүүлснээр аваргын алтан медаль, цомын эзэн болсон. Энэ ангилалд нийт найман мотоциклчин өрсөлдсөний дотор Монголын мото спортын цорын ганц эмэгтэй тамирчин Э.Янжмаа байв. Тэрбээр хөлдөө гэмтэлтэй байсан хэдий ч уралдааны замаа дуусгаж, үзэгчдээс өндөр үнэлгээ авсан юм. Энэ ангилалд мотоциклийн ОУХМ Б.Батцэнгэлийн хүү, залуу тамирчин Эрхэмбаяр мөнгөн медаль хүртлээ. Аав, хүү хоёр эх орондоо зохиогдсон Азийн АШТ-д хамтдаа тоосоо өргөсөн юм. Ахмад мастер Б.Батцэнгэл “Open class” буюу чөлөөт ангилалд уралдсан. Өсвөрийн мотоциклчдын хүрэл медалийн болзлыг Х.Ариунбат хангав. Тэрбээр мөн хоёр гараанд тус бүр гуравдугаарт хурдаллаа.

Монголчуудын гол найдар болох 125 сс ангилалд 2008 оны Азийн аварга Э.Халиунболд өрсөлдөв. Энэ ангиллын эхний гараанд тэрбээр зургадугаар тойрогт алдаа гарган мотоциклоосоо унасан ч уралдааныг итгэл төгс тэргүүлсэн. Түүний гол өрсөлдөгч Тайландын Пен Жан мөн эхний гараанд алдаа гаргаж өмнөө гурван ч тамирчинг алдсан юм. Гэвч тайланд эр өмнөх тамирчдаа гүйцэж түрүүлсээр энэ гараанд гуравдугаар байр эзэлсэн. Харин түүний өмнө манай оронд жил бүр ирж “Tissot cup Mongolia” уралдаанд оролцдог ОХУ-ын Ангарскийн тамирчин Евгений Голушка орлоо. Е.Голушка мөн энэ гараанд хамгийн хүнд харайлт дээр алдаа гаргасан ч хоёрдугаар байраа хадгалж үлдсэн юм. Энэ гарааны удаах байруудад Ираны Амир Реза, Монголын Х.Тэмүүжин нар ороод байв.

Азийн АШТ-ий ялагчийг тодруулах шийдвэрлэх гарааны эхний хоёр тойрог нэн сонирхолтой өрнөсөн. Тэргүүн байрын төлөө Э.Халиунболд, Тайландын Пен Жан нарын хоорндох өрсөлдөөн үзэгчдийн анхаарлын төвд байв. Гэвч ОУХМ Э.Халиунболд гуравдугаар тойрогт Тайландын тамирчныг гүйцэх үедээ осолдож хүнд гэмтэл авснаар уралдааныг орхисон. Ингэснээр тайланд эрд цаашид уралдааныг өнгөлөхөд саад тотгор байхгүй болов. Тэрбээр энэ гараанд алдаа гаргалгүй уралдсаар тэргүүлсэн. Улмаар хоёр гарааны нийлбэр дүнгээр Азийн аваргын II шатны уралдааныг тэргүүлж алтан медаль хүртлээ. Тэрбээр урадааны дараа барианы туг өргөн Монголын үзэгчдийн өмнө баярын тойрог хийсэн. Тайландын мотоциклчин өмнө нь Филиппинд болсон Азийн АШТ-ий цувралын эхний шатанд мөн тэргүүлээд байв. Ингэснээр тэрбээр нийлбэр дүнг мөн тэргүүлсэн хэвээр үлдлээ. Харин удаах байрт ОХУ-ын Евгений Голушка орсон бол хүрэл медалийг Ираны Амир Реза хүртэв. Удаах байрт Индонезийн Дадан, Японы Табүчи нар орсон байна

Моторын хөдөлгүүр харгалзахгүй оролцдог чөлөөт ангилалд нийт арван мотоциклчин оров. БНСУ, БНХАУ, Япон, Индонез, Тайландын тамирчид энэ ангилалд техникээ гамнах үүднээс оролцсонгүй. Учир нь тэд Азийн мотоциклийн холбооноос түрээсээр мотоцикл авч, тус уралдаанд оролцсон аж. Тиймээс Монгол, ОХУ-ын арван тамирчин энэ ангилалд өрсөлдөв. Эхний гараанд 125 сс ангиллын мөнгөн медальт Евгений Голушка тэргүүлж, ОУХМ Х.Тэмүүжин, ОХУ-ын Андрей Ружныков, Ираны Мачитаба нар удаалсан. Шийдвэрлэх хоёрдугаар гараанд ОХУ-ын Е.Голушка барианд орохоос хоёр тойргийн өмнө алдаа гаргасныг ОХУМ Б.Ган-Од ашиглан уралдааныг тэргүүлсэн. Түүний дараагаар ОХУ-ын А.Ружныков, А.Голушка нар орлоо. Хоёр гарааны нийлбэрээр Е.Голушка тэргүүлж, Монгол дахь гурав дахь түрүүгээ авлаа. Тэрбээр 2006, 2008 онуудад “Tissot cup Mongolia”-д аваргалж байв. Харин мөнгөн медалийг А.Ружныков хүртсэн бол монголчуудын цорын ганц медалийг Б.Ган-Од хүртэв. Тэрбээр эхний гараанд аман хүзүүдэж, хоёрдугаар гараанд тавд хурдалсан нутаг нэгт Х.Тэмүүжингээс ердөө нэг онооны илүү гарсан байна. Шийдвэрлэх гарааны ялагч болсон нь түүнийг шагналын тавцанд гаргалаа.

Хуваалцах/Тэмдэглэх

Валентино Россигийн ээлжит түрүү

Баярсайхан Г — Mon, 29 Jun 2009 17:18:42 +0000

Өнгөрсөн амралтын өдрүүдэд мотоциклын дэлхийн аваргын 7 дахь гараа Голландын Assen тойруулгад явагдлаа. Мото GP ангилалд Ямаха багийн нисгэгч Валентино Росси 26 тойргийг хамгийн хурдан буюу 42 минут 14.611 секундэд туулж энэ оны гурав дахь түрүүгээ хүртсэн байна. Тэрээр өмнө нь Испани, Каталоны гран прид магнайлаад байсан юм. Ийнхүү Росси 131 оноотой болж дэлхийн аваргыг тэргүүлсэн хэвээр үлдлээ. Харин түүний араас нэхэж яваа Хорхе Лорензо энэ гараанд бага зэрэг азгүйтэж ялагчаас 5 секундын хойно орсноор 126 оноотой болсон байна. Ер нь Голландын гараа Ямаха багийнханд ээлтэй байсан гэж хэлж болно. Тус багийн Колин Эдвардс, Жеймс Тоузлэнд нар 4 , 6-р байранд орж 23 оноог багтаа нэмэрлэсэн юм. Эсрэгээрээ Хонда багийнхны хувьд энэ өдөр тун азгүй байлаа. Тэдний багийн хоёр шилдэг нисгэгч болох Дани Педроза, Андрэй Довизиоси нар уралдааны үеэр осолдож тэмцээнээс хасагдсан юм. Сонирхуулахад Валентина Росси энэ гараанд түрүүлснээр карьерийн 100 дахь ялалтаа байгуулсан аж. Тэрээр BBC Sport-д өгсөн ярилцагадаа ”Маш их баяртай байна. Үнэхээр сайхан уралдаан боллоо. Лорензог ялахад хэцүү байх болно гэдгийг би мэдэж байсан. Гэхдээ өнөөдөр манай багийнхан үнэхээр сайн ажиллаа” гэжээ. 250 куб см-н ангилалд Хонда багийн Хироши Аяома, 125 куб см-н ангилалд Априлиа багийн Серхио Гадеа нар тус тус түрүүлсэн байна.

Голландын Гран-при Мото GP
1 Росси (Итали) Ямаха 42 мин 14.611 сек
2 Лорензо (Испани) Ямаха 42:19.979
3 Стөүнер (Австрали) Дукати 42:37.724
4 Эдвардс (АНУ) Ямаха 42:43.725
5 Вермеулен (Австрали) Сузуки 42:48.216
6 Тоузлэнд(Их Британи) Ямаха 42:53.958
7 Де Пунье (Франц) Хонда 42:54.154
8 Элиас (Испани) Хонда 42:54.385
9 Хайден (АНУ) Дукати 42:54.434
10 Капиросси (Итали) Сузуки 42:55.284
11 де Алжелис (RSM) Хонда 43:00.621
12 Меландри (Итали ) Кавасаки 43:12.388
13 Гибернау (Испани) Дукати 43:19.977
14 Канепа (ИталиЯп) Дукати 43:24.508
15 Такахаши (Япон) Хонда 43:24.541

Мото GP явц

1 Росси (Итали) 131 points
2 Лорензо (Испани) 126
3 Стөүнер (Австрали) 122
4 Дизийоси (Итали) 69
5 Педроза (Испани) 67
= Эдвардс (АНУ) 67
7 Капиросси (Итали) 55
8 Меландри (Итали) 54
9 Вермеулен (Австрали) 53
10 Де Пунье (Франц) 51

Хуваалцах/Тэмдэглэх

Стоунер Россигийн ноёрхлыг зогсоов

Баярсайхан Г — Tue, 02 Jun 2009 03:30:39 +0000

Өнгөрсөн амралтын өдрүүдэд явагдсан италийн гран при дуулиан шуугианаар дүүрэн байлаа. Сүүлийн долоон жил нутгийнхаа дэвжээг эзэгнэж байсан Валентино Россигийн супер амжилт энэ жил төгсгөл болсон бөгөөд Австралийн нисгэгч Кейси Стоунер 23 тойргийг 45 мин 41.894 секундын дотор туулж аваргаар тодорсон байна. Кейси энэ улиралын хоёр дахь түрүүгээ ийн авч байгаа бөгөөд оны эхэнд Катарын гран прид мөн түрүүлсэн юм. Стоунер ‘‘Гран при өндөрлөх болоогүй байна. Тиймээс ганц ялалтдаа хөөрөөд байх шаардлага алга. Ирэх гран прид хэн нэгэн сайн уралдаад миний өмнө орчиход энэ баяр хөөр ул мөргүй арилна шүү дээ. Тиймээс одооноос л бэлтгэлдээ гол анхаарлаа хандуулж байгаа. Ирэх Каталоны гараанд миний хувьд их найдвар тавьж байгаа. Сүүлийн хоёр жил энд би шагналын тавцан дээр гишгэсэн” хэмээжээ.
Италийн гран прин дараах байдлаар тэмцээнийг 90 оноотой Стоунер тэргүүлж байгаа бол араас нь 4 онооны алдагдалтай Хорхе Лорензо нэхэж байна. Өнгөрсөн Ле Маны гараанд гайхалтай уралдаж түрүүлсэн Испани эр энэ удаа амжилтаа давтахаар ихэд хичээсэн ч үр дүнд хүрсэнгүй, + 1.001 секундын алдагдалтайгаар аман хүзүүдсэн байна. Ерөнхийдөө тэмцээнийг тэргүүлэгчдээс Стоунер, Лорензо, Росси гурав тасархай амжилттай явж байгаа. Тэдэнтэй хамгийн ойр 4-р байранд яваа Данни Педроса л гэхэд 24 оноогоор хоцорчихсон байгаа аж. Педрозагийн хувьд энэ гараанд осолдсоноор ямар ч оноо авч чадаагүй нь ч үүнд багагүй нөлөөлсөн. Мөн түүний багийн анд Юки Такахаши замын дундаас осолдсон тул Хонда баг зохион бүтээгчдийн өрсөлдөөнд Дукатиг гүйцэхээсээ өнгөрөв бололтой. Одоогийн байдлаар Ямаха баг 115 оноотой зохион бүтээгчдийг тасархай тэргүүлж байгаа. Италийн Дукати 90 оноотой явж байгаа юм.
6 сарын 14-нд Испанид Каталоны гараа явагдана.

Италийн Гран При Moto GP ангилал

1 Стоунер (Австрали) Дукати 45:41.894
2 Лорензо (Испани) Фиат Ямаха 45:42.895
3 Росси (Итали) Фиат Ямаха45:43.970
4 Довизиосо (Итали) Репсот Хонда 45:44.023
5 Капиросси (Итали) Ризла Сукузи45:45.168

Дэлхийн аваргын явц

1 Стоунер 90 оноо
2 Лорензо 86 оноо
3 Росси 81 оноо
4 Педроса 57 оноо
5 Довизиосо 56 оноо

Хуваалцах/Тэмдэглэх

Хорхе хоёр дахиа

Баярсайхан Г — Sun, 17 May 2009 15:22:07 +0000

Мотоциклийн Гран прин ээлжит гараа Францын Ле Ман хотын авто тойруулгад явагдлаа Уралдааны өмнө бороо орж зам норсон тул нисгэгчдээс нилээдгүй ур чадвар шаардсан бөгөөд Мото GP ангилалд Испаний нисгэгч Хорхе Лорензо хамгийн хурдан цагийг үзүүлж аваргалсан байна. Лорензо ийнхүү энэ улиралын хоёр дахь түрүүгээ авч байгаа бөгөөд өмнө нь Японы Гран прид мөн аваргалаад байсан юм. Түүний хамгийн хүчтэй өрсөлдөгч Валентино Россигийн хувьд Францын зам тийм ч ээлтэй байсангүй. Итали эрд уралдааны дундуур гурван ч удаа мотоциклоо солих шаардлага гарсан бөгөөд үүнээсээ болж Лорензогоос + 2.700 секундээр хоцорч хоёрдугаар байранд оржээ. Одоогийн байдлаар Мото GP ангилалыг 66 оноотой Хорхе Лорензо тэргүүлж буй бол араас нь 65 оноотой Росси, Стөүнер нар нэхэж байна.

Тэмцээний явц Мото GP ангилал

байр	нисгэгч	орон	баг	оноо
1	Хорхе Лорензо	SPA	Fiat Yamaha	66
2	Валентино Росси	ITA	Fiat Yamaha	65
3	Кэйси Стоунер	AUS	Ducati Marlboro	65
4	Дани Педроса	SPA	Repsol Honda	57
5	Марко Меландри	ITA	Hayate Racing	43

250 куб сентиметрийн ангиланд Италийн нисгэгч Марко Симончелли 26 тойргийг хамгийн хурдан буюу 49 минут 07.591 секундэд туулж аваргалжээ. Гэхдээ тэрээр өмнөх тааруухан амжилтынхаа улмаас ердөө 10-р байр луу л урагшилж чадсан байна. Испаний Гран прид түрүүлсэн Японы Хироши Аояма энэ удаа дөнгөж наймдугаар байранд орсон бол Испаний шилдэг нисгэгчид болох Баутиста, Барбера нар ч гавьтай уралдсангүй.

1	Хироши Аояма	JPN	Scot Racing 250cc	58
2	Альваро Баутиста	SPA	Mapfre Aspar	54
3	Хектор Барбера	SPA	Pepe World	43
4	Томас Лути	SWI	Emmi – Caffe Latte	29
5	Хулес Клузел	FRA	Matteoni Racing	28

250 куб сентиметрийн ангилалын хувьд бас л олны таамаглаж байгаагүй нисгэгч түрүүллээ. Өмнөх Испаний Гран Прид оролцож чадаагүй Хульян Симон 24 тойргийг 47 минут 08.273 секундэд туулж хамгийн түрүүнд барианд орсон байна. Араас нь Германы ”битүү морь” Ёнас Фолгер 27 секундын дараа л барианд орсон гэхээр Симон хэр зэрэг тасархай байсан нь харагдаж байна. Гэхдээ нийт дүнгээр нь авч үзвэл Испани эр 4-р байранд л байна. Одоогоор Гран Прин явцыг 37.5 оноотойгоор Италийн нисгэгч Андреа Ианноне тэргүүлж байгаа бол 36.5 оноотой Их Британий 18 настай хүү Брэдлэй Смит удаалж байна.

байр	нисгэгч	орон	баг	оноо
1	Андреа Ианноне	ITA	Ongetta I.S.P.A.	37.5
2	Брэдлэй Смит	GBR	Bancaja Aspar 125cc	36.5
3	Пол Эспаргаро	SPA	Derbi Racing	31.5
4	Хульян Симон	SPA	Bancaja Aspar 125cc	30
5	Сандро Кортезе	GER	Ajo Interwetten	28

Мотоциклийн Гран Прин ээлжит гараа 5 сарын 31-ний өдөр Италийн Мужелло тойруулгад явагдана. Сонирхуулахад Валентино Росси энэ Гран Прин аврагыг сүүлийн 7! жил хэнд ч алдаагүй байгаа билээ.

Гран Прин торгон мөчүүдээс

Хуваалцах/Тэмдэглэх