"Спортын цонх" онлайн сэтгүүл - Спортод хайртай хүн бүрт зориулав! » Мотокросс

Цагдаагийн Дэлхийн Аварга Халиукаа

Ууган-Эрдэнэ Э — Thu, 01 Sep 2011 15:16:22 +0000

Мото Спортын Олон Улсын хэмжээний мастер, Ази Тивийн Аварга, Нийслэлийн Замын Цагдаагийн ажилтан Эрдэнэбилэгийн Халиунболд Америкийн Нэгдсэн Улсад болсон Аваргын Мотоциклийн Бартаат Замын Цагдаагийн Дэлхийн Аварга шалгаруулах тэмцээнд ТЭРГҮҮН БАЙР эзэллээ. New York хотноо болсон цагдаагийн дэлхийн аваргын тэмцээнд дэлхийн өнцөг булан бүрээс спортын олон төрлөөр өрсөлж байгаа юм байна. www.firepolicemx.com болон http://2011wpfg.org/ тус сайтуудад дэлгэрэнгүй мэдээллүүд байна.

Хуваалцах/Тэмдэглэх

“76 Enduro Сup”-т Х.Тэмүүжин түрүүллээ

Таван Цагариг — Mon, 27 Jun 2011 10:22:38 +0000

Монголын автомашин, мотоциклийн спортын холбоо “Шунхлай” групптэй хамтран “76” моторын тосыг сурталчлах зорилгоор мотоциклийн бартаат замын “76 Enduro Cup” уралдааны хоёрдугаар цувралыг өнгөрөгч амралтын өдрүүдэд зохион явуулав.

Уралдааны эхний шатанд хурд сорьсон тамирчид дээр “Алтай констракшн” компанийн тамирчин ОУХМ Э.Халиунболд, “Шунхлай” группийн тамирчин ОУХМ Х.Тэмүүжин, АНУ-ын Вашингтон хотод суралцаж байгаа ОУХМ Б.Ган-Од нарын шигшээ багийн тамирчид нэмэгдэж оролцсон нь тэмцээнийг илүү сонирхолтой болгосон юм. Тамирчид 3,5 км урттай, бартаа саад бүхий замыг зургаан тойргоор гурван удаа туулахад “Шунхлай” группийн тамирчин ОУХМ Х.Тэмүүжин хоёр гараанд түрүүлж, нэг гараанд хоёрдугаар байрт орсноор аваргалав.

Удаах байрт ОУХМ Б.Ган-Од, спортын дэд мастер Э.Баянжаргал нар шалгарлаа. “76 Enduro Cup”-ын хоёр гарааны нийлбэр дүнгээр спортын дэд мастер Э.Баяжаргал тэргүүлж, дэд мастер А.Дашдорж, I зэргийн тамирчин Н.Төртогтох нар удаалж явна. Нийт дөрвөн уралдааны нийлбэрээр аварга тодрох юм.

Өсвөр мотоцикльчдын уралдаан

Мөн МАМСХ БХТН-ийн Техникийн спортын төв хамтран мотоциклийн спортын өсвөрийн тамирчдын бартаат замын уралдааныг хоёр насны ангиллаар зохион явуулав. Дүн гарахад 10 хүртэлх насны ангилалд тэргүүн байрыг 58 дугаар сургуулийн дөрөвдүгээр ангийн сурагч Н.Итгэлхүслэн, удаах байрыг 24-р сургуулийн гуравдугаар ангийн сурагч П.Төрбат, гутгаар байрыг Дархан хотын I сургуулийн дөрөвдүгээр ангийн сурагч Э.Эрдэнэнэмэх нар эзэллээ. Тэгвэл тусгай шагналыг Эрдэнэт хотын тамирчин А.Төгөлдөр хүртсэн байна. 12 хүртэлх насны ангилалд 58 дугаар сургуулийн сурагч Х.Баттүшиг, 84 дүгээр сургуулийн сурагч П.Эрдэнэпүрэв, Г.Түвшинтөр нар эхний гурван байрт шалгарлаа.

Хуваалцах/Тэмдэглэх

Д.Болдбаатар “Дорнын говь”-д түрүүлэв

Спортын цонх — Sun, 20 Feb 2011 15:51:52 +0000

Монголын автомастеруудын холбооноос жил бүр уламжлал болгон зохион байгуулдаг “Дорнын говь” мастер кросс уралдаан өнгөрсөн ням гаригт Морингийн даваанд явагдлаа.

Тус уралдаанд нийт 30 орчим төмөр хөлөгтөн хурд хүчээ сорьсон бөгөөд “Дорнын говь” мастер кросс уралдааны өнгөрсөн жилийн аварга, мотоспортын ОУХМ Д.Болдбаатар түрүүлж, түүний хамгийн хүчтэй өрсөлдөгч, спортын мастер Ш.Гомбодорж хоёрдугаар байрт шалгарсан байна.

Харин удаахь байруудад спортын мастер Л.Ариунболд гуравт, Ж.Төрмөнх дөрөвт, н.Батнайрамдал тавд тус тус хурдалсан. Он гарснаас хойш Монголын автомастеруудын холбоо хоёр дахь тэмцээнээ ийнхүү амжилттай зохион байгууллаа.

Хуваалцах/Тэмдэглэх

Халиунболд дэд байрт орлоо

Ууган-Эрдэнэ Э — Fri, 08 Oct 2010 14:18:59 +0000

Мото Спортын ОУХМ Э.Халиунболд Ираны Тегеран Хотноо мотоциклийн бартаат замын Ази тивийн аварга шалгаруулах гурав дахь шатны тэмцээнд хурд сорьж хоёр гараанд хоёуланд нь дэд байрт шалгарчээ. Түүнтэй ижил оноотой явсан Японы Томоюки Сүзүки Ираны гараанд тэргүүлснээр Азийн АШТ-ийг ганцаараа өнгөлж эхлэв. Сүзүки, Халиунболд нарыг нэхэж буй Ираны Амир гуравдугаар байрт шалгарснаар энэ жилийн Азийн аваргаас медаль авах гурван тамирчин ерөнхийдөө тодорхой боллоо. Дөрвөн гараанаас бүрдэх Азийн АШТ-ий сүүлчийн буюу шийдвэрлэх гараа арваннэгдүгээр сард Саудын Арабт зохиогдох юм.

Хуваалцах/Тэмдэглэх

“Таван цагариг”-ийн нэрэмжит уралдаанд Д.Баасансүрэн өнгөлөв

Таван Цагариг — Sun, 11 Apr 2010 15:11:44 +0000

“Таван цагариг” сонины 15жилийн ойн нэрэмжит “Брижстоун-2010” автомашины спринтралли уралдаан өнгөрсөн бямбагаригт хуучны ардын армийн107-р ангийн автодром дээр боллоо.

Уралдааныг МАМСХ,БХТН-ийн Техник спортын төв,“Таван цагариг” сонин, “Таванбогд моторс” ХХК-тай хамтран зохион байгуулсан юм. Манай сонин МАМСХ-той нягт хамтран ажилласаар ирсэн бөгөөд өм нө нь “Таван цагариг”-ийн нэрэмжит уралдаан 2001-2005 онд явагдаж байлаа.

Энэ уламжлал сүү лийн хэдэн жил тасарсан ч өнөө жил дахин сэргэсэн нь энэ. Уралдаанд ОУХМ Ч.Эрдэнэчулуун, Х.Ганхүү, Б.Батцэнгэл тэргүүтэй 12 баг тоосоо өргөсөн юм. Уншигчдадаа ойлгомжтой байлгах үүднээс спринт ралли уралдааны талаар товчхон танилцуулья.

Олон улсын дүрмийн дагуу спринт ралли гийн нэг тойрог 10-25 км байдаг. Зохион байгуулагчид ямар хэмжээ тэй тойргийг хэд тойрохыг шийддэг аж. Манай энэ удаагийн уралдаан 12,6км тойргийг 10 тойрох ёстой байв. Тойрог гэхээр зүгээр нэг сайхан тэгшхэн замаар давхиад байх бус, уул давж, олон олон бартаа саадыг туулан өнгөрүүлэх тийм замыг зохион байгуулагчид сонгожээ. Өмнө нь манайд спринт ралли зо хиогдож байсан ч дандаа суудлын автомашинуудын дунд явагддаг байв.

Харин энэ жил анх удаа “УАЗ-469” машины дунд явуулснаараа онцлог байлаа. Тамирчид сугалааны дагуу 30 секундын зайтай гараанаас гарсан бөгөөд таван тойргийн дараа дундын барианд орсон. Эхний таван тойр гийн дараа “63” дугаартай Ө.Бямбадэлгэрийн экипаж 48 минут, 15 секундын амжилтаар уралдааныг хошуучилж байсан бол спортын мастер Д.Баасансүрэнгийн жолоодсон “4” дугаартай машин 29 секундын алдагдалтай хоёрт орж ирсэн.

ОУХМ Ч.Эрдэнэчулуун болон Ж.Даваажав, Л.Ариунболд нар 3-5-р байранд явж байв. Эхний таван тойргийн үеэр тамирчид газраа сайн мэдэхгүйн улмаас буруу замаар явах зэргээр хугацаа алдах тохиолдол хэд хэд гарсан. Харин дундын барианы дараа тэд замаа нэгэнт сайн судлаад авсан болохоор дараагийн таван тойрогт жинхэнэ ширүүн тэмцэл өрнөх нь тодорхой болов.

Ингээд тамирчид 20 минут амрах хооронд машиныхаа гэмтэл согогийг оношлон зассан тамирчид дараагийн таван тойрогтоо гарав. Энэ үеэс Д.Баасансүрэн, Ө.Бямбадэлгэр хоёр бусдаасаа илт тасарч, алтан медаль тэдний аль нэгэнд очих нь тодорхой болсон. Ернь энэ хоёр тамирчны өрсөлдөөн уралдааны гол чимэг байсан гэхэд хилсдэхгүй. Баасансүрэнгийн хувьд түрүүлэхийн тулд үлдсэн таван тойргийгөрсөлдөгчөөсөө 25-аас бага секундэд туулах ёстой байсан.

Улмаар ес дэх тойрог өндөрлөхийн алдад Баа сан сүрэн өрсөлдөгчөө гүйцэж түрүүлс нээр алтан медаль түүнд ирэх нь тодорхой болсон юм. Мөнгөн медалийг залуу тамирчин Ө.Бямбадэлгэр хүртсэн бол ОУХМ Эрдэнэчулуун гуравт хурдалжээ.

МАМСХ-ноос алт, мөнгө, хүрэл медаль хүртсэн тамирчдыг 500, 300, 200 мянган төгрөгөөр урамшуулсан. Мөн “Таван богд моторс” компани медаль авсан тамирчин тус бүрийг дөрвөн ширхэг “Брижстоун” дугуйгаар мялаасан юм. Ийнхүү манай сонины нэрэмжит уралдаан амжилттай явагдаж өндөрлөв. Тэмцээнийг сэтгэл гарган зохион байгуулсан МАМСХ, БХТН-ий ТСТ, “Таван богд моторс” компанийн хамтолон болоод ирж уралдсан бүх тамирчдад сониныхоо нэрийн өмнөөс талархал илэрхийлье.

Уралдааны дүн

(эхний зургаан байр)

Нэр Дугаар I II Нийт цаг

1.Д.Баасансүрэн 54 48,44 45,37 1:34,17

2.Ө.Бямбадэлгэр 63 48,15 46,20 1:34,35

3.Ч.Эрдэнэчулуун 78 50,19 46,30 1:36,49

4.Х.Ганхүү 10 54,06 49,50 1:43,56

5.Ч.Лхамжав 39 55,24 50,45 1:46,09

6.Лхагвасүрэн 33 56,52 50,22 1:47,12

Хуваалцах/Тэмдэглэх

Э.Халиунболд эхний гараанд түрүүллээ

BTV — Mon, 22 Feb 2010 08:42:07 +0000

Өчигдөр Филиппиний Пуэрто Фрэнцеса хотноо мотоспортын бартаат замын Азийн аварга шалгаруулах тэмцээний эхний шатны уралдаан явагдаж манай тамирчин мотоспортын ОУХМ Эрдэнэбилэгийн Халиунболд түрүүллээ. Тэрээр шинэ оны анхны тэмцээндээ амжилттай оролцож ийнхүү медалийн салхийг хагаллаа.

Тус тэмцээнд эх орноо төлөөлөн оролцож тоосоо өргөхөөр Мотоспортын ОУХМ Э.Халиунболд, Тэмүжин, Ган-Од, Баяржаргал нарын 4 тамирчин энэ сарын 16-ны өдөр Филиппинийг зориод байсан юм. Арав гаруй орны тамирчид хөлс хүч, авхаалж самбаагаа сорьсон энэхүү тэмцээн нэлээдгүй өрсөлдөөнтэй явагджээ.

Манай тамирчин ОУХМ Халиунболдын хувьд Азийн аваргын тэмцээнд 5 жил оролцоод байгаа юм. Тэрээр 2008 онд болсон Ази тивийн аварга шалгаруулах тэмцээний нийлбэр дүнгээр Ази тивийн аварга болж байсан бол өнгөрсөн жилийн нийлбэр дүнгээрээ дэд байрт шалгарсан амжилт үзүүлж байлаа.

Тэрээр Ази тивийн аварга шалгаруулах тэмцээнд оролцохын зэрэгцээ Тайландын мотоспортын аварга шалгаруулах уралдаанд оролцож байгаа бөгөөд маргааш тайландыг зориод 3-р сарын 7-нд тэнд хурд хүчээ сорихоос гадна бэлтгэл хийж байгаад Филиппинд эргэн ирж дараагийн тэмцээндээ оролцох юм. Нийт 6 гараатай явагддаг Ази тивийн АШТ-ний дараагийн 2-р гарааны уралдаан ирэх 3-р сарын 28-ны өдөр Филиппиний Манила хотод болно.

Дашрамд дуулгахад Монголын авто машин Мотоциклын холбоо Азийн аварга шалгаруулах цуврал уралдааны 4 дэх гарааг ирэх 9-р сард УБ хотноо зохион байгуулах эрхийг авсан байна.

Хуваалцах/Тэмдэглэх

Мотоциклчид дэлхийн уралдаанд

Таван Цагариг — Wed, 14 Oct 2009 10:49:50 +0000

Мотоциклийн бартаат замын багийн дэлхийн аварга шалгаруулах уралдаан Итали улсын Франкиакорта хотод аравдугаар сарын 3-4-нд зохиогдлоо. Уралдаанд дэлхийн 40 орны шилдэг баг хүрэлцэн очиж уралдлаа. Манай багийн бүрэлдэхүүнд дасгалжуулагч Ш.Эрдэнэбилэг, Э.Ууганбаяр, тамирчнаар MX1 ангилалд ОУХМ Э.Халиунболд, МХ2 ангилалд Х.Тэмүүжин, open ангилалд Б.Ган-Од, МҮОНРТ-ийн спорт эрүүл мэндийн редакцийн оператор Д.Болорцэцэг нар оролцлоо.
Монголын баг тамирчдыг энэхүү уралдаанд оролцоход Германы “Schalber Events” байгууллага хоёр дахь жилдээ ивээн тэтгэн тамирчдын уралдах мотоцикл, механик, бусад зүйлсийг Итали хүртэл тээвэрлэн аваачсан. Уралдаанд явахад МИАТ компани Улаанбаатар-Берлиний тасалбарт хөнгөлөлт үзүүлж, МАМСХ тамирчид болон телевизийн ажилтны зардлыг гарган оролцсон. Техник спортын төв нэг багшийн зардлыг гаргасанд баярлаж талархсанаа илэрхийлье. Манай багт сэтгэлийн дэмжлэг үзүүлсэн Германд суугаа элчин сайдын яамны хамт олон, боксын олон улсын шүүгч С.Баясгалан, ГОК-ийн орлогч захирал МАМСХ-ны удирдах зөвлөлийн гишүүн С.Бат-Энх, Мюнхен хотод амьдардаг Т.Лхамсүрэн, Берлин хотод суугаа Тунгалаг, мөн биднийг тосон авч амжилт хүссэн буудлагын тамирчин Д.Мөнхбаяр зэрэг хүмүүст талархлаа илэрхийлэх хэрэгтэй.
Тамирчид оролцсон ангилал бүртээ тавьсан зорилтоо биелүүлэн уралдлаа. МХ1 ангилалд Э.Халиунболд 40 тамирчинтай уралдсанаас 28-р байрт, МХ2 ангилалд Х.Тэмүүжин 40 тамирчнаас 35-р байрт, Open ангилалд Б.Ган-Од 40 тамирчнаас 33-р байрт шалгарч багийн дүнгээр 30-р байрт бичигдлээ. Уралдааны нийт дүнгээр АНУ-ын баг түрүүлж, таван жил дараалан аваргалан дархан амжилт гаргасан бол II-III байрт Франц, Бельгийн багууд шалгарсан юм. Дараа жилийн уралдаан 2010 оны есдүгээр сарын 25-26-нд АНУ-ын Денверт зохиогдоно.

Хуваалцах/Тэмдэглэх

Мотоциклчид Филиппинийг зорино

Таван Цагариг — Wed, 02 Sep 2009 03:00:00 +0000

Азийн мотоциклийн холбооноос жил бүр зохион явуулдаг мотоциклийн бартаат замын Азийн АШТ-ий цуврал гуравдахь гараа есдүгээр сарын 25-26-нд Филиппиний Манила хотноо болох гэж байна. Тус тэмцээнд оролцохоор манай дөрвөн тамирчин бэлтгэл сургуулилтаа хийж байгаа. Тэмцээнд ОУХМ Э.Халиунболд, Х.Тэмүүжин, Б.Ган-Од болон залуу тамирчин Б.Эрхэмбаяр нар оролцох юм. Азийн аваргын цуврал дөрөв дэх уралдаан арваннэгдүгээр сарын 19-нд Саудын Арабт зохиогдсоноор 2009 оны аварга тамирчин тодорно.
Азийн АШТ-ий явц
1.Танарат Пенжан (Тайланд)    95 оноо
2.Амир Реза Сабетифар (Иран)    68
3.Э.Халиунболд (Монгол)    65
4.Дадан Суприата (Индонез)    52
5.Шинхи Кага (Япон)        44
6.Крайн Край Тайннок (Тайланд)    36
7.Жан Карло Реллоса (Филиппин)    35
8.Такеши Табүчи (Япон)    31
9.Х.Тэмүүжин (Монгол)    30

Хуваалцах/Тэмдэглэх

Азийн мотокроссын аварга шалгаруулах тэмцээн (зургийн цомог №2)

Ууган-Эрдэнэ Э — Mon, 20 Jul 2009 13:41:39 +0000

Азийн мотокроссын аварга шалгаруулах тэмцээний зургуудаас цувралаар та бүхэндээ толилуулж байна. Эхний хэсгийг энд дарж харна уу.

Хуваалцах/Тэмдэглэх

Азийн мотокроссын аварга шалгаруулах тэмцээн (зургийн цомог №1)

Ууган-Эрдэнэ Э — Mon, 20 Jul 2009 11:48:54 +0000

Азийн мотоциклийн холбоо, Монголын автомашин мотоциклийн спортын холбоо, Монгол Улсын Засгийн газар, Эрүүл мэндийн яам, БТСГ-ын дэмжлэгтэйгээр мотоциклийн бартаат замын Азийн АШТ-ний цуврал II шатны уралдааныг өнгөрөгч амралтын өдрүүдэд зохион байгууллаа. Нийслэлийн Хан-Уул дүүргийн нутаг дэвсгэр, олны нэрлэж заншсанаар Морингийн даваанд явагдсан тус тэмцээнийг “АПУ” ХК, “Капитал” групп, “Таван богд” моторс, “Наран трейд” компани ивээн тэтгэв.
Тэмцээнд БНХАУ-аас хоёр, ОХУ-аас дөрөв, БНСУ, Филиппин, Иранаас хоёр, Тайланд, Индонез, Японоос тус бүр нэг тамирчин, Монголын 14 төмөр хүлэгтэн авхаалж самбаа, эр зоригоо сорин өрсөлдсөн. Тэмцээний өмнөх өдөр буюу бямба гаригт тамирчид хоёр удаагийн нэгдсэн бэлтгэл хийж уралдаанд оролцлоо. Энэ удаагийн тэмцээний аваргуудыг “Наран трейд” компани “Tissot” фирмийн бугуйн цагаар урамшуулсан юм.

Азийн АШТ-ий салхийг 12-14 насны 85 см ангиллын өсвөр үеийн мотоциклчид хагаллаа. Тус тэмцээнд Филиппиний залуу тамирчин Жеррик Митра хоёр гараанд хол тасархай тэргүүлснээр аваргын алтан медаль, цомын эзэн болсон. Энэ ангилалд нийт найман мотоциклчин өрсөлдсөний дотор Монголын мото спортын цорын ганц эмэгтэй тамирчин Э.Янжмаа байв. Тэрбээр хөлдөө гэмтэлтэй байсан хэдий ч уралдааны замаа дуусгаж, үзэгчдээс өндөр үнэлгээ авсан юм. Энэ ангилалд мотоциклийн ОУХМ Б.Батцэнгэлийн хүү, залуу тамирчин Эрхэмбаяр мөнгөн медаль хүртлээ. Аав, хүү хоёр эх орондоо зохиогдсон Азийн АШТ-д хамтдаа тоосоо өргөсөн юм. Ахмад мастер Б.Батцэнгэл “Open class” буюу чөлөөт ангилалд уралдсан. Өсвөрийн мотоциклчдын хүрэл медалийн болзлыг Х.Ариунбат хангав. Тэрбээр мөн хоёр гараанд тус бүр гуравдугаарт хурдаллаа.

Монголчуудын гол найдар болох 125 сс ангилалд 2008 оны Азийн аварга Э.Халиунболд өрсөлдөв. Энэ ангиллын эхний гараанд тэрбээр зургадугаар тойрогт алдаа гарган мотоциклоосоо унасан ч уралдааныг итгэл төгс тэргүүлсэн. Түүний гол өрсөлдөгч Тайландын Пен Жан мөн эхний гараанд алдаа гаргаж өмнөө гурван ч тамирчинг алдсан юм. Гэвч тайланд эр өмнөх тамирчдаа гүйцэж түрүүлсээр энэ гараанд гуравдугаар байр эзэлсэн. Харин түүний өмнө манай оронд жил бүр ирж “Tissot cup Mongolia” уралдаанд оролцдог ОХУ-ын Ангарскийн тамирчин Евгений Голушка орлоо. Е.Голушка мөн энэ гараанд хамгийн хүнд харайлт дээр алдаа гаргасан ч хоёрдугаар байраа хадгалж үлдсэн юм. Энэ гарааны удаах байруудад Ираны Амир Реза, Монголын Х.Тэмүүжин нар ороод байв.

Азийн АШТ-ий ялагчийг тодруулах шийдвэрлэх гарааны эхний хоёр тойрог нэн сонирхолтой өрнөсөн. Тэргүүн байрын төлөө Э.Халиунболд, Тайландын Пен Жан нарын хоорндох өрсөлдөөн үзэгчдийн анхаарлын төвд байв. Гэвч ОУХМ Э.Халиунболд гуравдугаар тойрогт Тайландын тамирчныг гүйцэх үедээ осолдож хүнд гэмтэл авснаар уралдааныг орхисон. Ингэснээр тайланд эрд цаашид уралдааныг өнгөлөхөд саад тотгор байхгүй болов. Тэрбээр энэ гараанд алдаа гаргалгүй уралдсаар тэргүүлсэн. Улмаар хоёр гарааны нийлбэр дүнгээр Азийн аваргын II шатны уралдааныг тэргүүлж алтан медаль хүртлээ. Тэрбээр урадааны дараа барианы туг өргөн Монголын үзэгчдийн өмнө баярын тойрог хийсэн. Тайландын мотоциклчин өмнө нь Филиппинд болсон Азийн АШТ-ий цувралын эхний шатанд мөн тэргүүлээд байв. Ингэснээр тэрбээр нийлбэр дүнг мөн тэргүүлсэн хэвээр үлдлээ. Харин удаах байрт ОХУ-ын Евгений Голушка орсон бол хүрэл медалийг Ираны Амир Реза хүртэв. Удаах байрт Индонезийн Дадан, Японы Табүчи нар орсон байна

Моторын хөдөлгүүр харгалзахгүй оролцдог чөлөөт ангилалд нийт арван мотоциклчин оров. БНСУ, БНХАУ, Япон, Индонез, Тайландын тамирчид энэ ангилалд техникээ гамнах үүднээс оролцсонгүй. Учир нь тэд Азийн мотоциклийн холбооноос түрээсээр мотоцикл авч, тус уралдаанд оролцсон аж. Тиймээс Монгол, ОХУ-ын арван тамирчин энэ ангилалд өрсөлдөв. Эхний гараанд 125 сс ангиллын мөнгөн медальт Евгений Голушка тэргүүлж, ОУХМ Х.Тэмүүжин, ОХУ-ын Андрей Ружныков, Ираны Мачитаба нар удаалсан. Шийдвэрлэх хоёрдугаар гараанд ОХУ-ын Е.Голушка барианд орохоос хоёр тойргийн өмнө алдаа гаргасныг ОХУМ Б.Ган-Од ашиглан уралдааныг тэргүүлсэн. Түүний дараагаар ОХУ-ын А.Ружныков, А.Голушка нар орлоо. Хоёр гарааны нийлбэрээр Е.Голушка тэргүүлж, Монгол дахь гурав дахь түрүүгээ авлаа. Тэрбээр 2006, 2008 онуудад “Tissot cup Mongolia”-д аваргалж байв. Харин мөнгөн медалийг А.Ружныков хүртсэн бол монголчуудын цорын ганц медалийг Б.Ган-Од хүртэв. Тэрбээр эхний гараанд аман хүзүүдэж, хоёрдугаар гараанд тавд хурдалсан нутаг нэгт Х.Тэмүүжингээс ердөө нэг онооны илүү гарсан байна. Шийдвэрлэх гарааны ялагч болсон нь түүнийг шагналын тавцанд гаргалаа.

Хуваалцах/Тэмдэглэх