by chukcha2002 » Fri Nov 10, 2006 12:32 am
Шевченко яагаад...?
М.СУГАР-ЭРДЭНЭ (2006.11.08)
Хөлбөмбөгийн түүхэн дэх хамгийн үнэтэй тоглогч Андрей Шевченког сүүлийн үед ихээхэн шүүмжлэх болсон билээ. Ингэхэд тэр Миланд байсан үеийнх шигээ тоглохгүй байгаагийн учир юу вэ? Ихэнх мэргэжилтнүүд Англид дасаагүй болохоор гэж хариулж байгаа.
Тэгвэл Шева яагаад Англид одоо болтол дасахгүй байна вэ? Ямайкийн шигшээгийн довтлогч Марлон Кинг аль эрт идээшсэн бол Андрей Шевченко болоогүй байнаа гэх аж. Идээшин дасахад бас учир бий. Хүн болгон чаддаг зүйл биш гэнэ. Марк Аткинс идээшиж чадсан бол Хуан Себастьян Верон чадаагүй.
Тьерри Анри, Деннис Бергкамп нар 2 сар болж байж нэг юм өөрийн хүн болж чадсан бол Пирес бүтэн жил зарцуулсан байх юм. Англид өмнөд америкчууд дасаж чаддаггүй бол харин скандинавуудад ямар ч бэрхшээл тулгардаггүй гэнэ. Мэдээж хэрэг Английн лиг өөрийн гэсэн онцлогтой, ирсэн болгон амжилт олох амархан боорцог биш. Гэхдээ л Шевченко шиг дэлхийн хэмжээний од олигтой тоглолт үзүүлж чадахгүй байгааг харахад нэг талаас сэтгэл өвдөж, нөгөө талаас гайхал төрөх аж.
Англид амжилт олоогүй тоглогчид олон бөгөөд хамгийн сүүлийн жишээ гэхэд л Аргентиний Тевес, Машерано нар юм. Гадаадаас тоглогч сонгохдоо гарамгай Арсен Венгер ч цагтаа Паскаль Сиган, Кабу Диавар, Олег Лужныйг багагүй мөнгөөр аваад шатаж байсан түүхтэй. Шевченкогийн тухайд бараг бүх л сонин хэвлэлээр шүүмжлэгдэж, Итали руу буцна гэсэн яриа ч гараад байгаа. Өөрөө Англид сайхан байна, ямар ч асуудал байхгүй гэж ярьж буй ч Шевченко нэг л биш байгаа нь хөлбөмбөг сонирхдог хэн бүхэнд тодорхой. За ингээд Шевченко хэзээнээс гоол хийж эхлэх вэ? Ер нь яагаад Англид очсон одуудад заавал нэг асуудал гардаг юм бэ? Хэвлэл мэдээллээр гарч байгаа таамаглалуудыг нэгтгээд үзье.
Цаг хугацаа хэрэгтэй
Үнэндээ бол Шевченко шууд л гоол хийгээд, гялалзаад эхэлсэн бол илүү гайхалтай ч байсан байж болох юм. Бергкамп анхны гоолоо 8 дахь тоглолтондоо оруулсан бол Анри 9 тоглолт зарцуулан хөлбөмбөг сонирхогчдод шүүмжлүүлж байв. Алдарт Эрик Кантона ч Манчестерийн баатар болохоосоо өмнө бүтэн жил Лидст зовсон билээ. Шевченкогийн одоогийн хөөрхийлөлтэй байдалд Дидье Дрогбагийн гялалзсан тоглолт нөлөөлсөн гэдгийг ч мартаж болохгүй. Дрогба ч 2 жил хэртэй Англид харь гаригаас ирсэн юм шиг л байсан билээ. Дрогба шиг тоглогч дээш гараад ирж байгаа юм бол Шевченко шиг авьяслаг тамирчин гарч ирэх нь гарцаагүй, харин бага зэрэг хугацаа л хэрэгтэй байна.
Шинэ газар ирээд дасаж идээшихэд хамгийн их асуудал гардаг нь довтлогчид. Макелеле, Хайнце, Хююпя, Шмейхель зэрэг өөр байрлалын тоглогчид Англид ирээд талбай дээрх үүрэг нь нутагтаа тоглож байсан үеэс нэг их хол зөрөөд байхгүй юм байна гэдгийг ойлгодог. Мэдээж хэрэг, хамгаалагч нарт хэцүү зэргээр марган, хамгаалалт хамгийн чухал хэмээн эсэргүүцэх хүн байх ч үнэндээ эвдлэн бусниулах гэдэг бүтээн байгуулахаас амархан зүйл билээ. Тэгвэл довтлогчдод багийхантайгаа хөл нийлүүлэхээс эхлээд өөр лигийн хурд хэмнэлд дасах гээд илүү урт хугацаа хэрэгтэй болдог.
Английн лигийн бохир тоглолт буруутай
Рой Кин нэгэнтээ Вероны тухай ярьж байхдаа премьер-лигийн бохир тоглолтоос болоод олон техниктэй тоглогчид Англид амжилт олоогүй гэдэг яриа **н** зүйл гэж хэлсэн байдаг. Английн хөлбөмбөг хэт хурдан, нэг хором ч амгалан байж болдоггүй тул хэмээн онош тогтоох нь амархан ч арай хялбарчилсан хэрэг болно. Хэрэв бохир, хурдан тоглоод амжилт олдог бол Английн шигшээ Уотфордынхноор дүүрэх байсан байх. Зола шиг техниктэй, жижигхэн тоглогч Будант Альбионд хичнээн сайн тоглож байсныг бодоод үзэхээр бохир тоглолтоос ч болдоггүй бололтой. Тэгээд ч Италийн эелдэг гэхээргүй хамгаалагчидтай тулалдаж дассан Шевченко хамгаалагч нар зэрлэг байна гэж гомдол гаргахгүй болов уу.
Хувийн элдэв асуудлууд
Гадаад оронд өөртөө итгэлтэй байх нь маш чухал. Верон, Форлан, Ребров, Луке нар итгэлгүй болсноос л Англид тоглож чадаагүй билээ. Хосе Антонио Рейес ч адилхан. Тэрбээр нутагтаа тогломоор байна гээд “Арсенал”-аас гарсан ч үнэндээ түүнийг Английн хөлбөмбөг гаргаад хаясан гэж хэлж болох юм. Зан ааш, тоглолтын арга барил нь шалгуур даагаагүй хэрэг. Хөлөндөө ганц өшиглүүлээд л Рейес гүйхээ больж байсан, өөрөөр хэлбэл бууж өгч байсан бол түүний эсрэг хамгийн тод жишээ бол Криштиану Роналду. Зориг зүрх, өөртөө итгэх итгэл гээд л.
ДАШТ дуусаад Манчестерийн балиашгууд алж тална гэж занаж байсан ч тэр хулчийгаагүй. Өөр багт очих нь хялбар арга байсан ч Роналду зугтаагүй. Ийм байж амжилт олохоос хичнээн авьяаслаг байгаад аймхай хулчгар бол Англид ирээд хэрэггүй бизээ. Рейес, Верон хоёр нас биенд хүрсэн томчуул гэмээргүй, эх орноо санаж байна, гэрийнхнээ дурсаж байна гээд л үглээд байсан нь ч тоглолтод нь нөлөөлсөн. Харин Шева эхнэртэйгээ цуг сонинуудын спортоос илүү дээдсийн буланд гарч байгаа нь Лондонгийн амьдрал таалагдаж байгаагийн гэрч болов уу.
Дасгалжуулагч буруутай
2001 онд Вероныг авснаасаа хойш сэр Фергюсон ихэд шүүмжлүүлсэн билээ. Анх Веронтой адилхан төвийн тоглогч, гэхдээ огт өөр стилийн Патрик Виейраг авахаар төлөвлөж байсан гэдэг. Үнэхээр Вероныг талбайн төвд эзэгнэнэ гэж бодсон нь анхнаасаа бүтэхгүй зүйл байсан. “Манчестер Юнайтед”-ын хагас хамгаалагчид дотор цорын ганц найруулагчийн мест байсан ба тэр нь агуу Кинд оногдож байв. Алдаа гаргаснаа ойлгосон Фергюсон Вероныг баруун зах руу шилжүүлэх зэргээр үзсэн ч амжилт олоогүй.
Энэ нь тоглогчдыг сайн судалж авалгүй нэр, хуучин гавьяагаар нь сонгодог фантази лигийн тоглогчдыг санагдуулж байгаа юм. За тэгвэл Шеваг алдартай болохоор нь, эсвэл Абрамович хайртай болохоор нь л авсан хэрэг үү гэсэн асуулт гарна. “Челси”-д тэр өөрийн байрлал дээр тоглож байна уу, үгүй юу? Мэдээж Шева украин биш байсан бол “Челси”д ирэхгүй байсан. Абрамович хуучин Зөвлөлт орны хөлбөмбөг сонирхогчдыг бүгдийг нь “Челси”-гийн балиашиг болгох зорилготой хүн.
Оросоос Смертинийг авч үзсэн ч амжилт гаргаагүйгээс гадна Орост олигтой тоглогч байхгүй тул хуучин Зөвлөлтийн цорын ганц супер од Шеваг ямар үнээр ч хамаагүй авах гэж хүссэн бөгөөд угаас хүссэнээ гартаа оруулдаг зангаараа “Милан”-аас салгаж чадсан. Гэвч энэ нь одоо эргээд Шевченкод гай тарьж байх шиг. Урьд өмнө бөмбөг оруулахгүй байвал Креспог ч, Дрогбаг ч сэлгээний сандалд суулгадаг байсан Моуриньо хичнээн муу тоглож байсан ч Шеваг үргэлж гараанд гаргаж байгаа нь “Челси”-гийнхэнд сайхан байхгүй нь ойлгомжтой.
Авч байгаа цалинг нь бодоод үзсэн ч тэр. Италид байхад нь Шевад Андреа Пирло, Кака, Кларенс Зеедорф, Руй Кошта гэсэн хагас хамгаалагч нар цохиод хий гэж хэлж буй мэт дамжуулалт өгдөг байсан бол “Челси”-д Шева Лампард, Баллак нарын холын дамжуулалт, эсвэл Дрогба сайхан ааш нь хөдлөөд бөмбөг тавьж өгнө гэдэгт найдахаас өөр арга байхгүй. “Челси”-гийнхэн бөмбөг авахаараа юуны түрүүн Дрогбаг хайх ба Шева илүү байрлалд байсан ч хамаа байхгүй Дрогбад л дамжуулна. Улирлын тал нь шахуу өнгөрөөд байхад хоёрхон гоолтой гэдэг дэндүү харамсмаар үзүүлэлт. Жо Коул буцаад ирэхэд юу л болдог бол доо.
Формондоо ороогүй байна уу?
Тиймээ. Уэйн Руни шиг л дэлхийн аваргын өмнөхөн авсан гэмтлийн уршигаасаа салж чадаагүй байгаа. Дээр нь шинэ баг, шинэ орчинд орсон нь ч мэдээж нөлөөлж байна. Хамгаалалтаараа алдаршсан Италид 207 тоглож, 127 гоол хийсэн супер тоглогч формондоо орохоор Английг байлдан дагуулах нь эргэлзээгүй. Харин хэзээ вэ гэдэг л байна.
